NOVA TERTULIA LITERARIA

O pasado luns 18 de marzo o club de lectura de 2º ESO volvemos encontrarnos nunha nova tertulia para pór en común as impresións viaxeiras en clave de suspense que nos transmitiu a obra Europa Express de Andrea Maceiras.

TERTULIAS DE INVERNO

Transitamos o frío do inverno cunha lectura que nos achegou caloriña e conversa.

Mais nesta ocasión as páxinas do libro O neno inverno tamén nos abriron a páxina da sorpresa e do encontro coa autora que soñou e escribiu esta historia da que tanto gustamos.

Graciñas pola túa visita, María Canosa. Foi un luxo terte entre nós!

UN CLUB A MEDRAR...

Xa estamos funcionando a pleno rendemento, mais tiñamos unha débeda pendente: presentar o noso club de lectura ao alumnado que se acaba de estrear no centro en 1º ESO.

Por fin chegou ese día de facermos as presentacións e podemos verificar que a recepción foi do máis positiva.

Estamos seguras de que en breve un novo equipo lector dará moito que falar en Coristranca e que ler...

De quen será o mérito principal? Pois de Carla, Uxía, María e Aarón, expertos lectores de 4º ESO.

CHAMANDO Á TERRA...

Recibimos unha chamada inesperada este sábado 14 de outubro e atendémola de moi bo agrado.

Quen estaba ao outro lado dos fíos? Nin máis nin menos que a escritora e locutora principal María Solar, coordinadora do programa da Radio Galega "Chamando á Terra".

E contamos parte do noso proxecto lector e adiantamos algunha das novidades para este curso.

Que queredes saber máis? Pois afinade o ouvido que por aquí queda!!!

COMEZA UNHA NOVA VIAXE LECTORA

Así rematamos o curso pasado o mural da nosa viaxe literaria ao longo dos meses. 

De volta do verán chegou a hora de reiniciarmos unha nova viaxe aventureira a través de novas páxinas.

Quen se apunta? Hai alguén aí?

PECHAMOS O LIBRO DO CURSO

Chegamos á fin de curso e temos que pechar o libro da  nosa memoria lectora.

Foi un pracer e un orgullo compartir lecturas cun equipo humano tan grande.

Vémonos o vindeiro curso, seguro que con máis caras novas conquistadas, mais tamén estrañaremos todas as que marchades para seguir o voso camiño formativo noutros centros. Gardámosvos un sitio sempre para compartir vida e amizade entre liñas e desde xa sodes moi benvidas ao noso estimadísimo Club d@s Ex-!!!

Bo verán, tamén lector!

INTERCAMBIO LECTOR CO IES OTERO PEDRAYO

Seguro que gardamos centos de imaxes para a lembranza do intercambio partillado co IES Otero Pedrayo da Coruña, mais faltaba a nosa síntese grazas ao traballo da compañeira Pilar Espido.

Está claro que o pasamos tan ben que nos veremos na obriga de repetir... ou non?

Grazas a todas e cada unha das persoas que o fixestes posíbel!!!

RESEÑEANDO

Patricia Bardanca e Antía Varela (4ºB) partilla connosco a súa valoración da lectura da novela Futuro imperfecto.

Futuro imperfecto é unha lectura totalmente recomendada. 

O tema que trata non é moi habitual na literatura que nos chega, xa que é considerado un tema tabú, pero é moi necesario que todos esteamos informados sobre ese mundo tan confuso, o mundo das drogas.

Nada mellor que un libro narrado en primeira persoa para contar unha experiencia de contacto coas drogas.

Dende o principio ata o final do proceso na súa parella protagonista e no seu contorno, con todo detalle, pasando pola síndrome de abstinencia, unha situación á que pode chegar calquera persoa.

Futuro imperfecto é unha lectura necesaria, diferente. É un libro fácil de ler, grazas á forma de escribir da súa autora, Xulia Alonso, tan cercana e, ao tempo, aditiva. É un libro que te fai pensar, que non esquecerás nunca e que te marcará para sempre.

Patricia

Futuro imperfecto é, sen dúbida, unha lectura que rondará na miña cabeza durante moito tempo.

Eu ata o de agora non lera nada relacionado coas drogas e neste libro está retratado con todo luxo de detalles.

Mediante esta lectura podemos mergullarnos nunha historia dura, mais ao tempo moi doce.

Seguindo a evolución dos dous personaxes principais, podemos ver momentos moi diferentes das súas vidas.

Sen lugar a dúbidas, este é un libro que ten que ler todo o mundo.

Recoméndovola a todos, estou segura de que vos ides emocionar como me pasou a min.

Moitísimas grazas a Xulia Alonso por deixarnos embriagar coas súas páxinas.

Antía

NOVIDADE LITERARIA DA MAN DE MARÍA SOLAR

Lembramos a María Solar d´As meigas de Lupa e agora podemos achegarnos ao primeiro capítulo da súa nova novela que chegará ás librarías a vindeira semana.

Desde aquí podedes ligar con ese primeiro capítulo que nos guiará polos primeiros pasos d´Os nenos da varíola, aquela expedición que saíu do hospicio da Coruña en 1803 para levar a vacina contra esta doenza até o Novo Mundo.

Que intriga...

OS TÍTULOS MÁIS LIDOS NOS CLUBS DE LECTURA O CURSO PASADO

Xa temos dispoñíbel a relación das lecturas favoritas nos clubs de lectura galegos do curso pasado. 

Moito nos soan algúns títulos, non si?

Seguimos tomando nota daqueles títulos que aínda non descubrimos.

ÁS PORTAS DO ENCONTRO CON MARÍA REIMÓNDEZ

A tertulia da pasada semana ao redor da novela de María Reimóndez, A dúbida, soubo a pouco. 

É por iso que na tarde deste mércores manteremos un encontro coa autora na libraría coruñesa Moito Conto, para aprofundar aínda máis nas claves persoais da escrita dunha obra destas características en que o silencio ao redor dos abusos sexuais segue a estar demasido presente na sociedade que vivimos.

Para quen aínda non leu A dúbida, adiantamos esta recente entrevista á autora.

Seguiremos informando...

CONTINUAMOS A MEDRAR...

Hoxe inicia a súa andaina lectora unha nova sección dentro do club de lectura do centro e desde aquí querémoslle dar a benvida.

Os novos membros de 1º de ESO inician esta travesía de lectura comunitaria entre liñas partindo dunha estación moi esixente coa novela Cartas de inverno de Agustín Fernández Paz, neste momento en que precisamente Edicións Xerais publica unha edición especial (a número 36) que conmemora os 100.000 exemplares vendidos.

O TOP DE LECTURAS

Xa coñecemos cales foron as lecturas favoritas dos clubs escolares galegos.

Seguro que nos recoñecemos nalgúns deses 50 títulos preferidos ao longo do curso pasado.

Unha boa guía orientativa, sen dúbida, para as propostas deste curso que xa iniciamos nos diferentes grupos do noso club: 

Coristranca, a lectura con retranca:  

A dúbida, de María Reimóndez

Ámote Leo A, de Rosa Aneiros

Unha estrela no vento, de Ledicia Costas.

XA CHEGA O SAMAÍN

A piques de entrar no propio día do Samaín, rematamos a semana intensiva de lecturas de medo coa sesión dirixida ao alumnado de 3º e 4º de primaria.

Zombis, esqueletes e vampiros puxéronnos medo e tamén nos deron que rir grazas ás boas lecturas de tres compañeiras do club de 3º ESO.

E, como non, se abriamos o luns a primeira sesión escoitando o medo na voz de Agustín Fernández Paz, tamén quixemos rematala coa lectura do seu libro Que medo, mamá Raquel!

 

RECREOS ENTRE LIÑAS

Esta semana, previa á chegada do Samaín, as participantes no club de lectura colaboran co EDLG no programa de lecturas de medo compartidas co alumnado na biblioteca de secundaria  e deslocaranse tamén ao punto de lectura de primaria para participar da súa Hora de Ler.

Abrirá a quenda da contada o noso querido escritor e amigo do centro, Agustín Fernández Paz, a quen lembraremos no noso día a día de xeito especial durante este trimestre.

CONTINÚA A NOSA XIRA DE PRESENTACIÓN

Antía, Nerea e Patricia, lectoras experimentadas do noso club, seguen coa súa xira de presentación do proxecto Coristranca e hoxe tocoulle a 2º B na aula de música, coa colaboración da profesora da materia (e tamén fotógrafa), Pilar Espido, como compañeira de lecturas.

Á vista deste primeiro encontro, a imaxe non engana... o novo club de 2º ESO tamén promete!!!

Atentas ás súas pantallas!!!

CLUB D@S EX-

Álvaro Antelo achéganos como proposta literaria para gozar dun bo tempo lector a obra poética de Lois Pereiro e cóntanos o seu proceso de descuberta deste poeta tan senlleiro, voz lírica única.

Grazas, Álvaro, por partillares connosco a túa emoción lectora e a complicidade que sentes na túa propia escrita poética con Lois Pereiro!

Escribir sobre Lois Pereiro sempre é un reto, ademais unha honra. Tiven a sorte de saber del cando cursaba estudos secundarios, mais a miña ignorancia naquel entón impediume achegarme a el. Anos despois, xa en bacharelato, din con el na biblioteca e (re)descubrín ao poeta que supuxo un punto de inflexión. 

Hai estrelas que logo de mortas seguen presentes, así é a poesía de Lois. Un raio no medio da treboada, ou máis ben un amencer literario. A intensidade da súa obra é tal que a día de hoxe segue a ser un dos referentes para as novas xeracións de escritores; entre os cales, humilde pero satisfeito me atopo eu.

O primeiro que sentín ao ler os seus poemas foi frío. Esa é unha das primeiras impresións que causa Lois, as súas verbas rachan no silencio. Abonda abrir Poemas 1981/1991 e ler o primeiro poema para darse conta de que non estás ante outro poeta calquera. Esa é unha das grandes virtudes da súa voz poética: a personalidade, a potencia coa que falaba. Dicían que Lois era o poeta anarquista; eu sempre penso que era pola valentía coa que escollía as palabras. Cando el escribía, a poesía asentía e calaba. 

Outra faceta da súa literatura é o intimismo tan potente dende o que escribe. Tal vez o seu primeiro poemario sexa unha obra máis metálica e punzante, como as agullas irónicas das que falaba; mais en Poesía última de amor e enfermidade a voz de Lois vólvese moito máis interna. Os poemas amósanse baixo unha atmosfera moi poderosa. É aí onde o poeta se fai humano.

Manuel Rivas dixo nunha ocasión que as palabras de Lois eran tan verdadeiras que semellaban pecado. Eu vou máis aló: as palabras de Lois son pecado, vida e morte; son a furia necesaria, o futuro alleo, a enfermidade, a irreverencia; son modestas proposicións para facer que deixen de xirar as portas; luces e sombras de amor... Especialmente amor. As palabras de Lois eran amor que resucitou ilimitado. "Contra a morte o amor que vai comigo" dicía nun dos seus poemas. Se teño que recomendar un poeta, sempre será Lois. Contra a morte os versos de Lois que van comigo.

                                                     

Admiro moitas cousas de Lois Pereiro. A súa valentía para afrontar a morte e plantarlle cara. A súa breve pero intensa literatura e a poderosa voz coa que a creou. Mais se hai algo que admiro de Lois é o seu espírito inconformista e rebelde, o seu anarquismo atroz e a súa negación a renderse. Desfruto do poeta, mais admiro a persoa.

"Permitirías ti, amor deserto, que nesta febre penitente abrise a derradeira porta e a pechase detrás miña, sonámbulo e impasible, ou porías o pé entre ela e o destino?". Eu si o poñería.

CLUB D@S EX-

Continuamos este curso enriquecendo a nosa sección de encontro literario co Club d@s Ex-.

A primeira en voltar a este recuncho para o reencontro é Ana Seoane, que nos ofrece unha ben suxestiva lectura: As voces baixas de Manuel Rivas.

Todo un convite á lectura! 

Grazas, Ana!!!

María, a irmá do  narrador, é o fío condutor dos diferentes capítulos que constitúen As voces baixas, de Manuel Rivas. 

O autor, con esta obra, achéganos aos recordos da súa infancia e ás persoas que formaron parte dela, ademais de recrear os distintos puntos da cidade da Coruña da época. Nas diferentes pasaxes do libro pódense apreciar os recordos e a melancolía do protagonista, pero sobre todo resalta a retranca galega do escritor.    

Desde logo trátase dun exemplar  distinto, que non engancha desde o primeiro capítulo pero que esperta grande curiosidade no lector/a, o/a cal desexa saber máis. 

Chegando ao final dos relatos é máis doado comprender a historia completa. Polo tanto, recomendo que se faga unha lectura calmada e gozar da mesma.

Convídovos a que investiguedes quen son as voces baixas ás que se refire o autor na obra.  

PRESENTANDO O NOSO CLUB

Cada curso Coristranca medra, igual que as amigas e amigos da lectura que o alimentan. 

Por iso hoxe Antía, Nerea e Patricia, lectoras experimentadas de 4º de ESO, presentaron o mundo de Coristranca ao alumnado de 2ºA que aínda non o descubrira.

Toda unha aprendizaxe de descubertas varias que estamos ben seguras en breve iniciarán o voo.

33 RAZÓNS PARA LER MÁIS

Velaquí algunhas razóns que convidan a ler, segundo Victoria Fernández, directora da Revista CLIJ (Cuadernos de Literatura Infantil y Juvenil).

• Para vivir máis 
• Para deter o tempo 
• Para saber que estamos vivos
• Para saber que estamos sós
• Para aprender 
• Para aprender a pensar
• Para descubrir o mundo
• Para  coñecer outros
• Para coñecer aos outros
• Para coñecernos a nós mesmos
• Para compartir un legado común
• Para crear un mundo propio
• Para rir
• Para chorar
• Para consolarnos
• Para desterrar a morriña
• Para  ser o que somos 
• Para non ser o que somos 
• Para dubidar 
• Para negar 
• Para afirmar 
• Para fuxir do ruído 
• Para combater a fealdade 
• Para refuxiarnos 
• Para evadirnos 
• Para maxinar 
• Para explorar 
• Para pasalo ben 
• Para soñar 
• Para medrar 
  
  
  Cales son as túas?