ADEUS!

E até aquí chegamos este curso na compaña do club de lectura.

Remata o curso e pechamos un tempo de andaina lectora común.

Cada libro é unha viaxe e cada viaxe deixa pegada.

Esta viaxe chega a unha primeira parada após 9 cursos de camiño conxunto entre profesorado, alumnado, familias e exmembros que nunca deixaron de estar connosco entre liñas.

Mais esta viaxe comezará en setembro con nova tripulación.

A min tócame despedirme agradecendo toda a colaboración prestada a quen fixo posíbel que o club de lectura fose un corazón e un cerebro a pleno rendemento emocional e sensitivo, capaz de facer medrar no noso centro a comunidade sentipensante que fomos construíndo, man a man, palabra a palabra.

Gratitude inmensa e os mellores desexos para a nova travesía.

Bo verán acompañado de boas lecturas!

 

 

DÍAS DE DESPEDIDA

Chegamos á meta e chegamos á festa de despedida do club de lectura para este curso.

Que ben o pasamos!!!!

INTERCAMBIO CO IES OTERO PEDRAYO DA CORUÑA

Gratitude inmensa, máis un ano, aos compañeiros e compañeiras do IES Otero Pedrayo da Coruña pola súa colaboración para dar continuidade ao convivio, primeiro epistolar e logo presencial, un novo curso.

Foi un pracer partillar convosco unha xornada intensa, máxica e lúdica!

PECHANDO TERTULIAS

Desta volta chegou a quenda tertuliana do club de lectura de 1º e 2º de ESO que compartiron impresións sobre A balada dos unicornios, de Ledicia Costas, e Trece anos de Branca, de Agustín Fernández Paz, respectivamente.

Absolutamente encantadas con estas dúas propostas lectoras que moito vos recomendamos, pechamos a nosa xeira de palabras en convivio para este curso.

Até a próxima parada lectora!

CORISTRANCA DE NOVO NAS ONDAS

O pasado 14 de maio o noso club, representado desta volta polas compañeiras Lucía e María, de 3º ESO, participou na emisión dun novo programa "A fume de carozo".

Foi un pracer participar deste seu primeiro traballo de guionización e locución dun intenso programa ao vivo durante unha hora.

Un programazo do que non imos adiantar contidos. Iso si, convidámosvos a que, se o perdestes ou queredes volver saborear o seu magnífico menú, mergulledes desde este enlace na frescura da súa conversa crítica e contrastada.

TERTULIA DX

Abrimos mes de abril convocándonos o encontro e a tertulia coa autora da nosa distópica lectura: DX, de Eli Ríos.

Con certeza unha lectura ben diferente para o equipo do club de 3º e 4º ESO e unha conversa absolutamente novidosa e, por veces, mesmo desconcertante, onde as respostas se converteron en novas preguntas.

Moitas grazas por vires, Eli!

NOVA TERTULIA LITERARIA

O pasado luns 18 de marzo o club de lectura de 2º ESO volvemos encontrarnos nunha nova tertulia para pór en común as impresións viaxeiras en clave de suspense que nos transmitiu a obra Europa Express de Andrea Maceiras.

CORISTRANCA VOLVE Á RADIO CUAC FM

Retomamos a nosa xeira radiofónica!

Se non nos puidestes escoitar ao vivo ou queredes volver compartir os bos momentos que pasamos este martes 26 de febreiro, mesmo malia algunha sorpresa!!!, velaquí vos deixamos o enlace de novo ao programa número 266 de "A fume de carozo".

Reiteramos a nosa gratitude ao Equipo de Dinamización da Lingua Galega do Colexio Calasanz (PP. Escolapios) da Coruña e a Roberto Catoira, o técnico, que sempre nos facilitan

Parabéns  ás locutoras Victoria Porteiro Bértoa, Rebeca Martínez Pena, Sara Álvarez Vilanova e Laura Gómez Velo!

TERTULIAS DE INVERNO

Transitamos o frío do inverno cunha lectura que nos achegou caloriña e conversa.

Mais nesta ocasión as páxinas do libro O neno inverno tamén nos abriron a páxina da sorpresa e do encontro coa autora que soñou e escribiu esta historia da que tanto gustamos.

Graciñas pola túa visita, María Canosa. Foi un luxo terte entre nós!

DE PASADO A FUTURO IMPERFECTO

Hoxe na tertulia as palabras custaron máis en saír porque as emocións asumiron todo o protagonismo. 

Cadaquén fica xa coa súa lectura impresa na pel, mais a opinión común é que foi unha lectura necesaria, das que marcan a fondo, como as vidas...

Grazas a Xulia Alonso, pola súa loita!

DE TERTULIA EN TERTULIA

Hoxe concluímos esta primeira rolda de lecturas trimestras con cadanseu encontro.

Nesta ocasión, o club de lectura de 2º ESO conversou arreo sobre as impresións e emocións múltiples que naceron a partir da lectura d´O corazón de Xúpiter de Ledicia Costas.

E como non hai tempo que perder, comezamos xa nova viaxe a través das páxinas de Europa Expréss, da autoría de Andrea Maceiras.

Vémonos á volta do aninovo!

TERTULIANEANDO

Despedimos este primeiro trimestre lector coa tertulia de 3º e 4º ESO ao redor da lectura d´A dúbida de María Reimóndez que cede paso agora ao encontro con Futuro imperfecto de Xulia Alonso.

Bo Ano Lector 2019!

RESEÑEANDO

Lucía Bermúdez (3º ESO) achéganos a súa proposta lectora para este tempo de descanso de nadal.

A ver que vos parece? Para ler sen medo...

CANDO CAE A LUZ, MARÍA CANOSA

Cando cae a luz é un libro de historias de medo. Foi escrito por María Canosa e recolle trece pequenos relatos de terror. Son contos con moita intriga propios para o Samaín ou para contalos xunto á lareira coa familia. Recoméndolle este libro a todas esas persoas ás que lles gusten as historias de medo e de intriga.

PRÓXIMA TERTULIA

ESTREANDO TERTULIA

Non puido comezar os encontros tertulianos con máis forza e ilusión este equipazo de 1º de ESO que moitas e boas lecturas prometen.

Con emoción e sentimentos encontrados partillaron impresións ao redor da lectura de Engurras.

Agora xa están devorando as liñas doutra historia ben intrigante: O neno inverno de María Canosa.

Seguide en antena porque seguiremos informando!!!

MÁIS PRESENTACIÓNS

E por fin chegamos á última presentación deste curso para lle dar a benvida por primeira vez ao club de lectura aos compañeiros e compañeiras de 1º ESO.

Con toda a forza ilusionante da estrea, comezamos coa lectura de Engurras, de Paco Roca!

Xa vos contaremos...

ANAGNÓRISE

O recoñecemento foi o fío condutor desta primeira tertulia do club de lectura de 3º e 4º ESO.

Recoñecemento de nós propias a partir de Xulia e Nicolau, os protagonistas cuxa relación en tránsito vai debullando María Victoria Moreno na novela que nos reencontrou literariamente por primeira vez este curso: Anagnórise.

  Unha tertulia fecunda en palabras, impresións e sorrisos compartidos, non si?

PRESENTÁNDONOS ( E II)

Continuamos coas presentacións das seccións do club e esta semana tocoulle a quenda ao lectorado de 2º de ESO.

Sempre é difícil comezar a escoller lectura, mais desta volta tivémolo claro moi axiña, así que decidimos irnos polas nubes con...

 O corazón de Xúpiter de Ledicia Costas

Vémonos axiña na nosa primeria tertulia deste ano, aínda que agora con toda a experiencia lectora, pois xa non somos os novatos do insti como o curso pasado...

Iremos contando...

TEMPO DE SAMAÍN EN PALABRAS

Chega o tempo de Samaín e recuperamos a nosa tradición de contar historias de medo aos máis peques do centro, desde 1º até 6º de educación primaria.

É sempre un pracer compartir lecturas convosco. 

Encantaríanos reencontrarnos entre liñas. Volvede axiña!!!

PRESENTÁNDONOS...

Feitas as presentacións no noso espazo favorito do instituto, o supersofá laranxa da biblioteca, facémolas agora públicas.

Con todas vós, velaquí o magnífico club de lectura de 3º e 4º ESO!!!

Comezamos a compartir a primeira lectura, unha gran novela dunha grande escritora que este ano 2018 deu moito que falar... e aínda dará!!!

De que e de quen estamos a falar???????