DESPEDIDA LECTORA

Non podía haber mellor despedida desta primeira avaliación para o noso club de lectura que unha gran quedada lectora na nosa biblioteca.

Compartimos libros e experiencias vividas ao redor de lecturas tan diferentes como Ámote Leo A., A cabeza de Medusa e Cartas de inverno. E de sobremesa tamén compartimos algunha larpeirada, claro!

Desde Coristranca, desexámosvos bo nadal, mellor aninovo e estupendas lecturas. E non esquezades que os Reis Magos saben ler, así que pedídelle moooooooitas suxestións de novos títulos!!!

CORISTRANCA EN PLENA ACCIÓN LECTORA!

Xa chegan as primeiras lecturas do noso club. 

Queredes saber cales son? 

Pois velaquí están os primeiros títulos seleccionados polos equipos lectores de 3º e 4º de ESO

EN COMPOSTELA CON ROSA ANEIROS E LEO A.

Resulta difícil pensar nun mellor xeito de pechar a lectura do primeiro volume da triloxía Ámote Leo A.

Aconteceu o pasado luns 5 de maio, mes das letras. Unha mañá ben diferente en que descubrimos, sorprendidas, unha gran biblioteca como é a Ánxel Casal.

Mais a sorpresa final fíxose agardar até as 14 horas cando recibimos nesta imponente casa dos libros compostelá a escritora que teceu os fíos da viaxe de Leo A.: Rosa Aneiros.

Preguntas e respostas conviviron neste tempo de conversa que nos axudou a completar a nosa lectura primeira con descubertas inesperadas. Quen nos diría que xa visitaramos previamente esta biblioteca nalgunha páxina!!!

BOOKTRAILER DE ÁMOTE LEO A.

Velaquí o booktrailer da triloxía de Ámote Leo A. da que moito falamos hai unhas semanas na sección do club de 4º. 

Seguro que algunha de vós recoñece a súa lectura fotográfica por aquí, non si?

E para aquelas curiosonas... xa podedes descubrir a portada do terceiro e último volume da serie: Terminal de ... chegadas?

PARLAMENTO DAS LETRAS CON ROSA ANEIROS

O blog do crítico literario Armando Requeixo ofrécenos unha nova entrevista coa autora de Ámote Leo A., recente lectura da nosa sección do club de 4º.

Escoitemos as palabras da escritora Rosa Aneiros reflexionando sobre a súa propia escrita nesta nova entrega do apartado "Parlamento das letras" que nos ofrece o blog Criticalia.

CRÓNICA REPORTEIRA TERTULIANA

O xoves 6 de marzo retornamos do entroido con moitas ganas de conversa, por iso, e por primeira vez, confluímos na tertulia os grupos de 3º e 4º de ESO con cadansúa lectura.

As alumnas e as profas de 4º viñan moi viaxadas despois de leren Ámote Leo A., a primeira parte da triloxía recén estreada de Rosa Aneiros, e logo de participaren coas súas fotografías tan creativas na campaña lanzada pola autora na súa conta de twitter.

Unha sección de 3º inaugurou a lectura da novela negra de contorno policíaco da man d´O corazón da Branca de Neve, de Francisco Castro e presentáronllo ás anteriores como nova suxestión de lectura que moito as atrapou.

Pola súa parte, a outra sección de 3º optara desta volta por non deixar escapar unha lectura moi recomendada polo grupo de 4º, Futuro imperfecto, de Xulia Alonso. 

Fantástica xornada de intercambio de palabras e emocións!

CORISTRANCA EN TWITTER CON ÁMOTE LEO A.

Esta semana a escritora Rosa Aneiros, autora da triloxía Ámote Leo A. iniciou unha campaña viral ben suxestiva a través de twitter.

Co gallo da publicación da segunda entrega, convidou todas aquelas persoas lectoras da primeira parte desta triloxía a captar imaxes relacionadas co libro e vinculalas co amor, xa que, entre a Candeloria e o San Valentín está claro que camiñamos polo Mes do Amor...

O grupo lector de 4ºESO tomouno moi en serio e púxose mans á obra ou mellor dito ao obxectivo fotográfico. O resultado non puido ser de mellor calidade e enxeño e por iso Rosa Aneiros non só quedou encantada coas propostas que Cintia, Verónica, Judith, Jenni e Lucía lle enviaron, senón que xa empezaron a chiar e rechiar pola rede twitteira @RosaAneiros.