CORISTRANCA, A FUME DE CAROZO

O prometido é débeda e nós sempre cumprimos, así que aquí vos deixamos o enlace ao noso primeiro programa radiofónico, grazas á xentileza de Radio Cuac FM e mais do ENDL do Colexio Calasanz (PP Escolapios) da Coruña, representado polo sempre eficaz técnico Roberto Catoira.

Agardamos que gustedes de todos os contidos que vos preparamos con moita ilusión Carla, Uxía, Laura e María, membros do club de lectura de 3ºESO.

Nós xa andamos a preparar o guión do seguinte programa. Escoitarémonos o 21 de febreiro!!!

REINICIAMOS LECTURA NAS ONDAS

Esta tarde fría de xaneiro reiniciamos unha das experiencias vinculadas á lectura que tanto nos presta: lanzar as nosas voces ao ar a través da maxia de Radio Cuac FM.

En breve ofreceremos o acceso dixital á gravación de Carla, Uxía, Laura e María para quen non nos puidestes escoitar en rigoroso directo.

Atención ás súas pantallas e emisora on line se queredes saber máis de Manuel María e Asunción Antelo ou se queredes escoitar a fantástica conversa que mantivemos coa escritora María Reimóndez, autora de tres novelas que nos últimos tempos foron moi do noso agrado: Usha, Volvo! O regreso de Usha e A dúbida.

VERSOS PARA MANUEL MARÍA

Descubrir os fíos da vida e da obra de Manuel María a través da maxia de Martín Camiña e do músico Álvaro Muras abriu a clausura dun ano dedicado ao poeta o luns 19 de decembro.

Unha visita á Casa Museo Manuel María de Outeiro de Rei, unha ofrenda poético-floral no cemiterio que acolle o poeta e unha visita a algúns espazos naturais admirados polo noso autor nos seus versos, como o Castro de Viladonga ou as Penas de Rodas, serviron para lle pór o ramo a este intenso Ano Manuel María o martes 20 de decembro.

A inmensa obra literaria de Manuel María é o mellor legado para nos achegar a el en calquera momento. A súa obra será sempre a nosa próxima parada!

CON MANUEL MARÍA

Continuamos lendo a Manuel María máis aló da celebración do Día das Letras Galegas e partillando as escollas poéticas do noso club nos corredores do centro.

Grazas, Adriana e Alba, por atraernos ás vosas lecturas!

NOVO PROGRAMA RADIOFÓNICO XA NA ONDA!

O pasado martes 5 de maio emitimos ao vivo o que xa foi o noso último programa en Radio Cuac FM. Unha mágoa, mais xa sabemos que todo o bo sempre acaba ben cedo!!!

Miriam, María e Nuria, da sección do club de lectura de 3º ESO, prepararon un completísimo guión que nos lembrou o ben que o pasaran na celebración do Correlingua, esa mesma mañá, polas rúas da Coruña, algunhas das súas propostas para un completo menú lector e a lembranza de dúas efeméredes que estamos a celebrar neste 2016: o centenario das Irmandades da Fala e mais a homenaxe a Manuel María como autor destacado neste vindeiro Día das Letras Galegas.

Non faltaron as entrevistas, non. Desta volta, por partida dobre: unha a Ledicia Costas e outra a Mercedes Queixas. De que andarían a falar?

Non podemos descubrir nada, nin sequera a oferta degustación musical tan variada, así que mergullade por estas ondas virtuais e volvede cantas veces queirades escoitar o estupendo programa deste gran equipo radiofónico.

Un aplauso grande para María, Nuria e Miriam!

MANUEL MARÍA NO DÍA DO LIBRO

Este pasado 23 de abril celebramos o Día do Libro cunha lectura colectiva da obra de Manuel María, o poeta que estamos a descubrir neste curso co gallo da celebración do vindeiro Día das Letras Galegas na súa honra.

Vivimos un acto que nos transmitiu a riqueza e a diversidade da obra poética do autor, grazas ás voces de alumnas do club de lectura e colaboradoras do EDLG.

Grazas a todas pola vosa participación na lectura, a través da vosa voz e da vosa escoita!

MISTERIO DESVELADO

Averiguamos que era o que andaban a argallar as tres compañeiras do club de lectura, Miriam, Nuria e María.

Escoitámolas en directo na súa estrea radiofónica no programa "A Fume de Carozo", emitido o pasado martes 23 de febreiro e promovido polo Equipo de Dinamización da Lingua Galega do Colexio Calasanz (PP. Escolapios) da Coruña. 

Para atender as vosas peticións, xa que non todos puidestes estar pendentes da emisión ao vivo, partillamos agora convosco o enlace para que aprendades e gocedes tanto coma nós coa elaboración deste guión radiofónico.

Reiteramos o noso agradecemento ao escritor cormelán Suso Lista pola atentísima entrevista que nos concedeu.

E a todos os nosos radiooíntes, grazas polos ánimos e por seguirnos!!!!

ARGALLANDO...

Hoxe pillamos in fraganti a Nuria, Miriam e María moi concentradas entre papeis... Que andarán a argallar?

Só sabemos que quedaron de verse para unha cita que teñen entre as 17 e as 18 horas no ar ou nas ondas... irán dar unha volta polas ondas gravitacionais esas que están tan á moda?

Tirámoslle da lingua e só puidemos averiguar que o misterio se desvela hoxe no 103.4 FM.

Non perderemos o fío até descubrir que traen entre mans máis aló dos papeis...

DE CORISTANCO A OUTEIRO DE REI (II)

Lembranza fotográfica da nosa homenaxe poético-floral a Manuel María no cemiterio de Santa Isabel de Outeiro de Rei

O TEMPO DO NADAL, MANUEL MARÍA

DE CORISTANCO A OUTEIRO DE REI (I)

Encamiñamos os nosos primeiros pasos cara á descuberta do poeta Manuel María, colocando a primeira pedra do que será o ano grande en 2016 coa celebración do Día das Letras Galegas na súa honra.

Iniciamos a mañá do mércores 16 de decembro visitando a Casa-Museo do autor na casa familiar dos Hortas, en Outeiro de Rei da Terra Chá luguesa.

Da man da poesía de Manuel María, viramos cara ao noso pasado castrexo e romano para descubrir as características do Castro de Viladonga.

E rematamos a xornada coas sempre sorprendentes Penas de Rodas, aínda que sen chegar a saber cal delas é a que garda o ouro e cal o alcatrán. E iso que algúns compas lle meteron forza para as abanearen!

Fantástica xornada, non si?

Pero aínda falta unha sorpresiña de algo que moito nos prestou. Atención ás imaxes de vindeiras entradas!!!

VISITA Á CASA MUSEO DE MANUEL MARÍA

Unha sección do noso club de lectura de centro participou na ofrenda poético-floral que realizamos a Manuel María no cemiterio de Outeiro de Rei, antes de visitarmos a recentemente inaugurada Casa Museo. 

Unha xornada de descubertas emocionantes na biblioteca desta casa como foi poder ler a copia facsimilar do xornal A Nosa Terra ou da Revista Nós.

CÁMARA, ACCIÓN E LECTURA NA BIBLIOTECA!

CAPÍTULO 4: NOS VERSOS DE MANUEL MARÍA

MARINA DE LA IGLESIA E MÓNICA TATO ( 3º B)

CÁMARA, ACCIÓN E LECTURA NA BIBLIOTECA!

CAPÍTULO III: OS SOÑOS NA GAIOLA

FÁTIMA ÁLVAREZ VILANOVA (2º A)