DESPEDIDA DE XABIER P. DOCAMPO

Pechamos este curso coa triste nova da despedida física do escritor Xabier P. Docampo. 

Facemos nosas as súas palabras: 

Sen dúbida, o acto máis sublime de amor que eu coñezo é contar unha historia.

Procurarémolo en cada nova lectura e relectura da súa importante obra porque os escritores e as escritoras sempre permanecen para sempre na súa escrita.

E VEÑAN MÁIS PALABRAS AO CLUB D@S EX!

Recibimos unha nova compañeira de viaxe virtual agora que xa non a temos connosco no centro: Nerea Fernández. Benvida!!!

Para esta primeira colaboración, Nerea preséntanos unha obra ben coñecida, escrita por Xabier P. Docampo, O misterio das badaladas.

Ollade para as súas impresións lectoras que son porta para abrir á descuberta dunha historia ben misteriosa e curiosa...

Gustoume moito a idea de que as ex-alumnas seguisen participando no Club. Como eu tamén son unha delas, aquí vos deixo un libro magnífico de Xabier P. Docampo titulado O misterio das badaladas. 

Como o propio título di, esta historia trata dun reloxo que se acaba de poñer en marcha e as súas badaladas son exactas, doce badaladas, pero ás doce da noite dá trece! 

Como pode ser posible? 

Se queredes axudar aos rapaces a descubrir o misterio, tédelo que ler. 

Dende logo é un libro que te mete de cheo na historia que conta, xa que te fai pensar como é posible que dea unha badalada de máis e sobre todo ás doce da noite.

CARTAS DE INVERNO

Con estas caras de satisfacción comentamos esta nova lectura de Agustín Fernández Paz na sección do club de lectura de 2º.

As súas Cartas de inverno serviron para nos intrigaren ou incluso para pórnos medo pola noite.

E despois da tertulia e de moito pensar e repensar para decidir cal sería o próximo título, por primeira vez, a falta de un, escollemos dous que xa agora vos adiantamos vos se queredes ir lendo á par nosa: A casa do medo, de Agustín Fernández Paz e A illa de todas as illas, de Xabier P. Docampo.

Xa vos contaremos que dá de si esta nova experiencia lectora compartida...

DA PALABRA Á IMAXE

Moitas veces tivemos nas mans libros ilustrados onde imaxe e texto conviven, retrátanse e compleméntanse.

Mais nunca falamos de como se chega a producir ese encontro. Como se debuxan as emocións? Como se representan os conceptos abstractos? E os lugares e tempos descoñecidos? Como se lle dá forma ao pasado ou ao futuro?

Algunhas respostas obtivémolas no encontro celebrado este venres no Kiosco Alfonso da Coruña con Xosé Cobas e Xabier P. Docampo.

Va que foi unha experiencia única?

CONTOS DE NADAL II

Xabier P. Docampo ábremos a porta do seu blog a outro conto de nadal que tamén podemos escoitar, na súa propia voz, tal e como o contou no programa da radio galega "Galicia por diante" o propio día de nadal.

Imos descubrir a sorpresa deste conto intitulado "Un mago en noiteboa".

CANDO PETAN NA PORTA POLA NOITE...

Nunca se sabe o que pode acontecer cando petan na porta pola noite, especialmente se se trata dunha noite de invernía, friaxe, brétema e auga a caer a chuzos...

Xabier P. DoCampo transmitiunos moita tensión e mesmo algún soño nocturno nervioso a partir dos catro relatos que conforman este libro que estivemos a traballar na sección do club de 1º ESO.

Incluso, animado pola temática do libro, Julián contounos moitos relatos que nos puxeron algo de medo: cans que oubean raro, certas presenzas de familiares desaparecidos...

E mesmo contaxiou a María, que tamén nos falou de sucesos inexplicábeis que teñen acontecido pola redonda da súa casa...

E para rematar este encontro coas palabras e coa nosa tradición oral, nada mellor que escoitar o propio Xabier P. DoCampo contarnos un anaquiño do seu Conto de tres noites.

Unha nova tertulia fantástica, para recuncar prontiño!!!!

DESVELANDO CURIOSIDADES

Como se converte unha persoa en escritora? Cando? Por que?

Quen non se fixo estas preguntas algunha vez na vida?

Imos coñecer de primeira man como e cando comezou a escribir Xabier P. Docampo, o autor das historias temerosas que aconteceron nestes últimos meses Cando petan na porta pola noite.

http://www.aelg.org/Centrodoc/ShowMediaLibraryVideo.do?id=90

Imaxinabas uns comezos así?

QUE É O QUE PASA CANDO PETAN NA PORTA POLA NOITE?

Cando petan na porta pola noite é o libro que estamos a ler no club de lectura en 3º e 4º de ESO. Habitualmente empezamos os libros polo principio, va que si? Pois nós descubrimos que este libro conta no final unha historia única: a historia dos medos do autor que o escribiu: Xabier P. Docampo.

Velaquí vos deixamos os seus medos!

http://xabier-docampo.net/documents/24.html

Cales son os teus?