... FRANCISCO CASTRO!!!
Velaquí a entrevista dixital que mantivo a sección do club de lectura de 2º co autor da nosa última lectura, O corazón de Branca de Neve.
Grazas, Francisco, pola túa atenta dispoñibilidade para iniciar este primeiro encontro virtual que se concretará noutro presencial no mes de marzo. Agardámoste!!!
ENTREVISTA
1. Por que escolleches o título d´O corazón de Branca de Neve?
Pois esa é unha pregunta que non debo responder aquí....porque a
resposta está no derradeiro capítulo da novela. De feito é algo que lle
pasa a todas e todos os que len o libro, que pasan os capítulos e
pregúntanse por que se titulará así. No derradeiro dise algo que o
xustifica...así que non podo contestar ou cárgome a intriga da novela...
2. En que te inspiraches para construír a historia?
Eu xa tiña bastante desenvolvido o personaxe do Inspector Hermida na
miña cabeza. Un policía vigués, no final da súa carreira, con algún
trauma persoal importante (cóntase na novela) que lle fai infeliz. Pero
sobre todo, un tipo honrado, un señor serio que quere facer o mellor que
pode o seu traballo e atrapar aos delincuentes. Sobre o que
preguntades, debo dicir que a clave deuma unha nova da prensa que falaba
dunha rapaza, embarazada, e que estaba sendo explotada sexualmente por
un grupo de proxenetas. Cando foi liberada pola policía, declarou que
lle dixeran que así como dese a luz ían vender o seu bebé. De aí naceu o
inicio da historia.
3. Con que personaxe te quedarías?
Sen dúbida co Inspector Hermida. Un home íntegro, eficaz, aínda que
afastado do típico poli de novela de detectives, super espabilado e todo
iso. Gústame Hermida porque é moi consciente das súas limitacións, do
importante da sorte á hora de investigar, e porque é quen de recoñecer
que ás veces non ten nin idea do que está pasando. Se ao final triunfa é
porque é unha persoa seria e consciente de que hai que loitar para
atrapar aos delincuentes. É un home tenro que me gustaría ter como amigo
para tomar algo por aí nalgún bar, comentando as noticias do xornal e
todo iso...
4. Que personaxe che custou máis elaborar?
O personaxe máis difícil foi o toxicómano. É un ser extremo, dominado
pola súa adicción, afeito a facer barbaridades por esa dependencia pero
que, ao tempo, está farto e quere, aínda que lle custa, cambiar de vida.
Facelo que parecese "real" foi o máis difícil de todo.
5. Tiñas claro desde os comezos ese final ou mudáchelo durante a escrita?
Tíñao máis ou menos claro. Cando escribes novela policial, na que a
arquitectura interna da historia é tan importante, adoitas telo todo
case que claro antes de poñerte a escribir. Logo hai sorpresas, claro. E
personaxes que cobran un protagonismo que ti non pensabas darlle. Pero,
en liñas xerais, estaba todo moi medido antes de me sentar a escribir.
6. Como te sentiches cando lle concederon a este libro o Premio de Novela por Entregas de La Voz de Galicia?
Pois imaxinade. Moi contento. Cando te presentas a un premio é coa esperanza de gañar. Así que, se gañas, a felicidade é grande.
7. Cal vai ser o teu próximo libro?
Pois durante este ano 2014 sairá unha novela dirixida ao público
xuvenil. Será despois do verán. Tiña que ter saído o ano pasado, pero,
como gañei o premio, decidín adiala un ano.
