DE TERTULIA EN TERTULIA

Hoxe concluímos esta primeira rolda de lecturas trimestras con cadanseu encontro.

Nesta ocasión, o club de lectura de 2º ESO conversou arreo sobre as impresións e emocións múltiples que naceron a partir da lectura d´O corazón de Xúpiter de Ledicia Costas.

E como non hai tempo que perder, comezamos xa nova viaxe a través das páxinas de Europa Expréss, da autoría de Andrea Maceiras.

Vémonos á volta do aninovo!

PRESENTÁNDONOS ( E II)

Continuamos coas presentacións das seccións do club e esta semana tocoulle a quenda ao lectorado de 2º de ESO.

Sempre é difícil comezar a escoller lectura, mais desta volta tivémolo claro moi axiña, así que decidimos irnos polas nubes con...

 O corazón de Xúpiter de Ledicia Costas

Vémonos axiña na nosa primeria tertulia deste ano, aínda que agora con toda a experiencia lectora, pois xa non somos os novatos do insti como o curso pasado...

Iremos contando...

TOMAMOS A PALABRA

Todos os días son óptimos para as nosas tertulias, mais hoxe coincidiu con unha desas datas sinaladas no calendario: o Día Internacional do Libro.

O noso punto de encontro recibiunos para a tertulia do club de 2º ESO ao redor dunha obra que gustou e, sobre todo, sorprendeu: O corazón de Xúpiter, de Ledicia Costas.

Precisades algunhas razóns para a ler? Pois velaquí algunhas pistas orientadoras...

1. Axúdache a abrir os ollos cara ás redes sociais (Rosa)

2. Axúdache a non confiar naquelas persoas que só coñeces a través das redes sociais e poden non ser como din (Lucía)

3. Axúdache a abrir os ollos ante o que che di unha amiga, aínda que sexa contrario á túa opinión (Naihara)

4. É moi entretido e axúdache a non confiar nas redes sociais e ter coidado co que publicamos (Yovanna)

5. É moi bonito e axúdache a aprender (Ivanna)

6. Axúdache a non confiar en quen non debes (Valentina)

7. Aprendes que non todo é o que parece (María Pazos)

8. Hai que facerlle caso aos consellos dos amigos e non confiar tanto nas persoas que non coñeces (María Varela)

AS DE 2º TAMÉN QUEDAMOS!

Esta semana non podía comezar mellor!

O equipo lector de 2º ESO descubriu un grande historia e unha magnífica escritora que desde xa vos recomendan non perder: Ledicia Costas e Unha estrela no vento.

E tanto gustamos que foi irresistíbel a tentación de continuar a saber da súa escrita, así que xa andamos entre as liñas interespaciais d´O corazón de Xúpiter.

Contaremos!!!!

TERTULIANEANDO

Esta semana estamos imparábeis e non podía faltar no noso plan de acción unha nova tertulia.

Nesta casión foi a sección do club de 2º ESO quen se reuniu na tarde do mércores para comentar e partillar impresións sobre a lectura d´O corazón de Xúpiter, de Ledicia Costas.

Deixámosvos algunhas impresións recollidas polo equipo -Victoria, Kevin, María, Laura, Raúl e Rubén- para que non deixedes escapar unha lectura tan intensa como é esta.

O corazón de Xúpiter pareceunos moi interesante porque a historia que narra Ledicia Costas serve para aprender a usar internet e as redes sociais de forma adecuada. O libro ensina a non confiar nas persoas estrañas, descoñecidas, e a facerlle caso ás persoas que máis te queren e coñecen.

Recomendámoslle este libro a todo o mundo porque esa advertencia dos perigos da rede é importante para todos.

Adiviñades cal é a nosa  próxima lectura escollida?

A FUME DE CAROZO!

Xa chegou o momento de escoitar por primeira vez ou de volver a encontrarnos nas ondas internetplanetarias.

O noso foi o programa número 150 de "A fume de carozo", emitido o 25 de novembro de 2014, Día contra a Violencia de Xénero. Está promovido polo Equipo de Dinamización da Lingua Galega do Colexio Calasanz (PP. Escolapios) da Coruña e grávase no estudo "José Couso" de Radio CUAC FM.

De violencia de xénero e tamén de literatura, cunha entrevista a Ledicia Costas, o equipo de locución estivo composto polas alumnas de 4º e membros do Club de Lectura de centro, Iria Castiñeira, Vanesa Varela, Leticia Muíño e Nerea Fuentefría.

Grandes parabéns para todas elas!!!

FANTÁSTICA EXPERIENCIA RADIOFÓNICA!

Renovamos as expectativas previas á xornada de gravación. O tempo de elaboración do guión, o intercambio de opinións, a escolla de lecturas e banda sonosora musical, etc. cedeu paso ao goce da emisión dun programa ao vivo.

Escoita atenta das primeiras instrucións técnicas...

... e no aire canda as nosas palabras e as de Ledicia Costas nunha entrevista ben esclarecedora para o equipo.

O noso agradecemento para todas as persoas que o fixeron posíbel e moi especialmente para o técnico, Roberto Catoira, sen cuxo estímulo e colaboración sería imposíbel termos vivido esta experiencia que, sen dúbida, repetiremos este curso.

E para quen non nos puido escoitar en directo, teredes unha nova oportunidade de acceso ao programa on line que vos facilitaremos en breve.

NOVO FALADOIRO LITERARIO

En Coristranca continuamos a devorar lecturas, deixarnos sorprender con novas historias e partillar palabras colectivas.

Nesta ocasión tocoulle a quenda á sección de 2º ESO, moi emocionada (aínda que tamén algo enfastiada por ese final tan dramático e inesperado) coa historia protagonizada pola confiada Isla, quen se nega a ver que o Xúpiter que se agocha detrás da pantalla nocturna do computador quizais non sexa quen di ser.

Non deixedes de vos mergullar n´O corazón de Xúpiter, da escritora Ledicia Costas.

LEMBRANZA GRÁFICA DO ENCONTRO CON LEDICIA COSTAS E FRANCISCO CASTRO

Velaquí a testemuña gráfica que nos axudará a lembrar unha xornada de sorpresa e descuberta. Detrás da escrita dun libro que emociona sempre hai unha persoa observadora que ten moito que nos contar.

Grazas Ledicia e Francisco, polas vosas palabras!

TERTULIAS LITERARIAS MOI NOVIDOSAS

Hoxe, no club de lectura de 2º, mantivemos unha dobre tertulia literaria ben novidosa.

Iniciamos a mañá desprazando as aulas rutineiras á Casa Galega da Cultura de Vigo para nos encontrarmos alí con Francisco Castro e Ledicia Costas, convertidos nos nosos escritores acompañantes dos últimos meses.

É hora da reflexión. Que palabras expresarían o que esta experiencia significou para vós?

NOVO PREMIO PARA LEDICIA COSTAS

Esta fin de semana a escritora Ledicia Costas acaba de recibir un novo premio pola súa obra O corazón de Xúpiter, esa novela que tanto nos gustou no club de lectura.

Nesta ocasión, o recoñecemento, en forma de premio, chegou desde a AELG (Asociación de Escritoras e Escritores en Lingua Galega) no marco da celebración na Coruña da Gala das Letras.

Dámoslle os parabéns á escritora desde Coristranca!!!

NOVA TERTULIA LITERARIA

A sección de 2º ESO do noso club de lectura volveu reunirse o pasado xoves 18 de abril para intercambiar opinións e sensacións provocadas pola lectura da novela O corazón de Xúpiter de Ledicia Costas, unha autora que máis unha vez nos abraiou coa súa narrativa atrapadora e cos seus finais dramáticos.

Tamén houbo tempo para reflexionarmos, a partir desta lectura, sobre os inconvenientes das redes sociais se non sabemos manexalas con responsabilidade e un pouquiño de desconfianza protectora.

E o mellor de todo: o ambiente comunicativo co que a literatura e os libros nos agasallan sempre. Que ben o pasamos!!!

PREMIO PARA LEDICIA COSTAS

Onte, venres 15 de marzo, a autora d´Unha estrela no vento, Ledicia Costas, recibiu o premio ao mellor libro infantil e xuvenil que anualmente concede a Asociación Galega de Editores polo seu novo libro O corazón de Xúpiter.

Ledicia Costas xunto aos demais gañadores

Desde Coristranca enviámoslle un saúdo inzadiño de parabéns e agradecémoslle novamente os momentos que nos fixo pasar coa lectura d´Unha estrela no vento e coa magnífica tertulia que nos proporcionou recentemente.

Agora estabamos a piques de comezar O corazón de Xúpiter, así que nos alegramos moito desta nova.

Parabéns, Ledicia!