CORISTRANCA VOLVE Á RADIO CUAC FM

Retomamos a nosa xeira radiofónica!

Se non nos puidestes escoitar ao vivo ou queredes volver compartir os bos momentos que pasamos este martes 26 de febreiro, mesmo malia algunha sorpresa!!!, velaquí vos deixamos o enlace de novo ao programa número 266 de "A fume de carozo".

Reiteramos a nosa gratitude ao Equipo de Dinamización da Lingua Galega do Colexio Calasanz (PP. Escolapios) da Coruña e a Roberto Catoira, o técnico, que sempre nos facilitan

Parabéns  ás locutoras Victoria Porteiro Bértoa, Rebeca Martínez Pena, Sara Álvarez Vilanova e Laura Gómez Velo!

DE PASADO A FUTURO IMPERFECTO

Hoxe na tertulia as palabras custaron máis en saír porque as emocións asumiron todo o protagonismo. 

Cadaquén fica xa coa súa lectura impresa na pel, mais a opinión común é que foi unha lectura necesaria, das que marcan a fondo, como as vidas...

Grazas a Xulia Alonso, pola súa loita!

TERTULIANEANDO

Despedimos este primeiro trimestre lector coa tertulia de 3º e 4º ESO ao redor da lectura d´A dúbida de María Reimóndez que cede paso agora ao encontro con Futuro imperfecto de Xulia Alonso.

Bo Ano Lector 2019!

CHEGA UNHA NOVA EDICIÓN BOOKTUBER

Bianca, María, Patricia e Lucía ofrécennos unha nova entrega da nosa serie booktuber como peche da lectura desta novela que tanto prendeu nelas, como en todo o noso club de lectura.

Con todas vós, Futuro imperfecto de Xulia Alonso.

ENCONTRO CON XULIA ALONSO

A sección do club de 4ºESO celebramos o 14 de febreiro dun xeito especial e inolvidábel.

A visita de Xulia Alonso, autora de Futuro imperfecto, ampliou o horizonte das nosas lecturas e da nosa tertulia previa para coñecer os tempos, a secuencia do proceso da súa escrita e a experiencia vivida após a publicación.

E Esperanza agasallounos cunha sorpresa que non esqueceremos nunca e coa que moito imos campar todo o equipo.

Agradecidas ás dúas por unha tarde compartida xa para sempre!

RESEÑEANDO

Patricia Bardanca e Antía Varela (4ºB) partilla connosco a súa valoración da lectura da novela Futuro imperfecto.

Futuro imperfecto é unha lectura totalmente recomendada. 

O tema que trata non é moi habitual na literatura que nos chega, xa que é considerado un tema tabú, pero é moi necesario que todos esteamos informados sobre ese mundo tan confuso, o mundo das drogas.

Nada mellor que un libro narrado en primeira persoa para contar unha experiencia de contacto coas drogas.

Dende o principio ata o final do proceso na súa parella protagonista e no seu contorno, con todo detalle, pasando pola síndrome de abstinencia, unha situación á que pode chegar calquera persoa.

Futuro imperfecto é unha lectura necesaria, diferente. É un libro fácil de ler, grazas á forma de escribir da súa autora, Xulia Alonso, tan cercana e, ao tempo, aditiva. É un libro que te fai pensar, que non esquecerás nunca e que te marcará para sempre.

Patricia

Futuro imperfecto é, sen dúbida, unha lectura que rondará na miña cabeza durante moito tempo.

Eu ata o de agora non lera nada relacionado coas drogas e neste libro está retratado con todo luxo de detalles.

Mediante esta lectura podemos mergullarnos nunha historia dura, mais ao tempo moi doce.

Seguindo a evolución dos dous personaxes principais, podemos ver momentos moi diferentes das súas vidas.

Sen lugar a dúbidas, este é un libro que ten que ler todo o mundo.

Recoméndovola a todos, estou segura de que vos ides emocionar como me pasou a min.

Moitísimas grazas a Xulia Alonso por deixarnos embriagar coas súas páxinas.

Antía

DE TERTULIA

Este martes mantivemos un novo encontro tertuliano coa sección do club de 4º. 

A lectura de Futuro imperfecto, asinado por Xulia Alonso, deixou unha forte pegada en todo o equipo lector e moito o recomendamos. En breve, deixaremos por aquí algunhas pistas...

Desde aquí queremos darlle a benvida ao noso tempo e espazo de conversa presencial a Esperanza, unha nai que, desde comezo de curso, nos acompaña a profesoras e alumnado como lectora fantástica nesta singradura que nunca nos decepciona.

Viva Coristranca!

TOMAMOS A PALABRA II

E seguimos coa rolda de pequenas reseñas sobre as lecturas que imos descubrindo. Nesta ocasión, cedémoslle o paso ao comentario crítico de Ana Rodríguez Rodríguez (3º A) sobre a novela Futuro imperfecto, de Xulia Alonso.

O amor e o olvido, a vida e a morte.

Estas catro verbas son a clave a partir da cal nace Futuro imperfecto, unha historia totalmente real, contada pola persoa que foi quen de vivila máis de cerca, a escritora e protagonista Xulia Alonso.

Esta autobiografía cóntanos a experiencia de Xulia, desde os seus dezasete anos, como estudante universitaria en Santiago, onde atopa a peor época para ser unha moza en busca dunha liberdade, o que a levará a parar ao mundo das drogas, como a moitas persoas adolescentes da súa xeración.

A súa loita contra o VIH e a que tamén sufriu o seu compañeiro, Nico, unha das persoas máis importantes da súa vida, pai da súa filla, e a quen axudou a saír adiante todo o posíbel cando nin ela mesma podía. Importantísima tamén a súa filla, pois grazas ao amor de nai, puido seguir coa súa vida despois da perda de Nico.

Unha historia fascinante, que será imposible ler sen que o corpo do lector sufra algún calafrío.

CRÓNICA REPORTEIRA TERTULIANA

O xoves 6 de marzo retornamos do entroido con moitas ganas de conversa, por iso, e por primeira vez, confluímos na tertulia os grupos de 3º e 4º de ESO con cadansúa lectura.

As alumnas e as profas de 4º viñan moi viaxadas despois de leren Ámote Leo A., a primeira parte da triloxía recén estreada de Rosa Aneiros, e logo de participaren coas súas fotografías tan creativas na campaña lanzada pola autora na súa conta de twitter.

Unha sección de 3º inaugurou a lectura da novela negra de contorno policíaco da man d´O corazón da Branca de Neve, de Francisco Castro e presentáronllo ás anteriores como nova suxestión de lectura que moito as atrapou.

Pola súa parte, a outra sección de 3º optara desta volta por non deixar escapar unha lectura moi recomendada polo grupo de 4º, Futuro imperfecto, de Xulia Alonso. 

Fantástica xornada de intercambio de palabras e emocións!

UNHA RESEÑA PARA FUTURO IMPERFECTO

Futuro Imperfecto é unha historia autobiográfica da escritora ourensá Xulia Alonso. Neste libro, a autora ten que enfrentarse a unha serie de dificultades persoais que fixeron que a súa vida cambiase totalmente. A droga, a aparición e, sobre todo, a experiencia do VIH serían as dúas razóns principais de toda a historia que desenvolve neste libro.

Todo xira en torno á época dos 80, cando unha relativa paz acaba de instaurarse e a liberdade é o principal obxectivo do sector adolescente, sen ter en conta todos os perigos aos que se verían sometidos.

Xulia é unha estudante de 17 anos que muda a Santiago. Ela tan só busca nesa nova cidade unha nova vida, sen saber que os novos mundos que descubriría tan só lle quitarían o que estaba procurando atopar: a liberdade.

Grazas á súa nova vida, atopouse con Nico, o home que faría que a súa vida cambiase de rumbo. Xuntos loitaron contra as novidades que aparecían naquela década, e xuntos pasaron os últimos momentos da vida del. Tras unha serie de dificultades tentando atopar a saída do que parecía ser un inferno causado polas drogas, conseguiron estabilizar a súa vida, ata que, a nova do seu embarazo fixo saltar as alarmas e a vida volveu parecer unha serie de pezas dun crebacabezas desordenado.

Finalmente, a vida de Nico, o seu compañeiro, quedou condicionada e limitada polo VIH. 

Neste libro, Xulia explica, con moita carga sentimental e dor, todas as súas experiencias durante estas duras décadas e todo o seu apoio, atención e cariño dirixido ao seu compañeiro ata os últimos días da súa vida.

Con este libro, as sensacións son completamente perceptibles. Deixa todos os secretos da súa vida ao descuberto, e case parece unha historia totalmente ficticia, debido a todos os acontecementos tan duros que ocorren na súa vida.

Judith Martínez (4ºESO)

PRIMEIRAS IMAXES TERTULIANAS

Iniciamos a rolda de tertulias despois de lle dedicar á lectura individual estas semanas de principios de curso.

Xa nos tardaba, mais chegou e foi unha tarde estupenda grazas á historia que Xulia Alonso nos conta na súa novela, de ascendencia autobiográfica, Futuro imperfecto.

Moito pensamos antes de arrancar a falar... Sempre nos pasa... Primeiro cumpría presentar as novas incorporacións: Judith, Lucía e Cintia no equipo das alumnas e Mabel no de profesoras, máis concretamente a orientadora de profas e alumnas... Verónica, Katiana, Carme e Mercedes démoslles a benvida!

Que atentas Judith, Lucía e Katiana!!!!! Quen andaría a falar? Que contaría?

Chegamos á conclusión de que a realidade case sempre supera a ficción, aínda que nos pilla moitas veces tan de lonxe, felizmente, que non o podemos nin imaxinar.

Expresións que falan por si propias...

Canta información vivida moi ao vivo e desde a experiencia profesional nos transmitiu Mabel sobre consumo de drogas na actualidade e consecuencias...

 

As do sofá laranxa da esquerda moi ben pasaron... mais empezamos a botar en falta alguén nas fotos...

 

Temos probas: a lectura provoca risa...

Por certo, onde nos quedou Pilar, a profa de música? Ah! Foi a nosa master en fotografía... para a próxima non se libra do retrato!!!!

INAUGURAMOS AS NOSAS TERTULIAS LITERARIAS

Despois destas primeiras semanas de comezo de curso tamén dedicado á lectura, imos estrear a nova tempada tertuliana.

Nesta primeira ocasión será a novela Futuro imperfecto quen nos convoque na tarde do vindeiro MARTES 12 DE NOVEMBRO na nosa biblioteca.

 Neste momento a autora non nos poderá acompañar, mais seguro que nos visitará un pouquiño máis adiante. Mentres, ímola ir coñecendo destoutro xeito...

As sensacións lectoras foron moi boas, mais gardade algo para contar ese día...

LECTURA DE DESPEDIDA

Xulia Alonso nun encontro co alumnado do club de lectura do IES de Curtis

Xa queda pouquiño para rematarmos o curso, mais no club de lectura somos xente organizada e combinamos todos os traballiños que nos veñen enriba cuns minutiños de lectura.

A sección do club de lectura de 3º e 4º imos introducirnos nun mundo ben diferente a todos os que nos acolleron nas lecturas anteriores da man da novela Futuro imperfecto de Xulia Alonso.

Imos achegarnos un bocadiño a esta lectura de forma externa, para saber que pretendía a autora coa escrita deste libro que ela define como "un canto á supervivencia, á non resignación" e que non nos deixará impasíbeis.