LENDO LENDAS

Despois da lectura dalgunhas das lendas da nosa comarca bergantiñá, cumpría percorrer in situ os espazos reais mencionados na recompilación lendaria da autoría do especialista e exprofesor do noso centro Xan Fernández Carrera.

Fantástica xornada para gozar e saber do noso. Iso si, sempre coa pregunta no aire: "E sería verdade ou non...?

DA PALABRA Á IMAXE

Moitas veces tivemos nas mans libros ilustrados onde imaxe e texto conviven, retrátanse e compleméntanse.

Mais nunca falamos de como se chega a producir ese encontro. Como se debuxan as emocións? Como se representan os conceptos abstractos? E os lugares e tempos descoñecidos? Como se lle dá forma ao pasado ou ao futuro?

Algunhas respostas obtivémolas no encontro celebrado este venres no Kiosco Alfonso da Coruña con Xosé Cobas e Xabier P. Docampo.

Va que foi unha experiencia única?

VERSOS PARA MANUEL MARÍA

Descubrir os fíos da vida e da obra de Manuel María a través da maxia de Martín Camiña e do músico Álvaro Muras abriu a clausura dun ano dedicado ao poeta o luns 19 de decembro.

Unha visita á Casa Museo Manuel María de Outeiro de Rei, unha ofrenda poético-floral no cemiterio que acolle o poeta e unha visita a algúns espazos naturais admirados polo noso autor nos seus versos, como o Castro de Viladonga ou as Penas de Rodas, serviron para lle pór o ramo a este intenso Ano Manuel María o martes 20 de decembro.

A inmensa obra literaria de Manuel María é o mellor legado para nos achegar a el en calquera momento. A súa obra será sempre a nosa próxima parada!

DE CORISTANCO A OUTEIRO DE REI (II)

Lembranza fotográfica da nosa homenaxe poético-floral a Manuel María no cemiterio de Santa Isabel de Outeiro de Rei

DE CORISTANCO A OUTEIRO DE REI (I)

Encamiñamos os nosos primeiros pasos cara á descuberta do poeta Manuel María, colocando a primeira pedra do que será o ano grande en 2016 coa celebración do Día das Letras Galegas na súa honra.

Iniciamos a mañá do mércores 16 de decembro visitando a Casa-Museo do autor na casa familiar dos Hortas, en Outeiro de Rei da Terra Chá luguesa.

Da man da poesía de Manuel María, viramos cara ao noso pasado castrexo e romano para descubrir as características do Castro de Viladonga.

E rematamos a xornada coas sempre sorprendentes Penas de Rodas, aínda que sen chegar a saber cal delas é a que garda o ouro e cal o alcatrán. E iso que algúns compas lle meteron forza para as abanearen!

Fantástica xornada, non si?

Pero aínda falta unha sorpresiña de algo que moito nos prestou. Atención ás imaxes de vindeiras entradas!!!

O ENCONTRO MÁIS AGARDADO

Por fin chegou o encontro máis agardado para o noso club de lectura. 

Mágoa que non puidésemos desprazarnos todos os membros do club a Vigo, á sede da Fundación Penzol, para coñecermos a Agustín Fernández Paz. Ficará, pois, na lembranza do alumnado de 3º e 4º de ESO.

Case parecía que o coñeciamos despois de tantas e tantas lecturas, despois dunha demorada e completa entrevista radiofónica no noso programa "A Fume de Carozo", mais faltaba este encontro presencial para nos desenredar as "intimidades" da súa escrita.

Seguro que nin imaxinades de onde nace o "chispazo" das súas obras: dun anuncio publicitario das páxinas dun xornal, dunha fotografía tamaño carné tirada na rúa, das súas inquietudes pola física e pola astronomía...

Canto nos prestou este deslocamento a Vigo desde Coristanco. Grazas, moitas grazas Agustín, por acudires ao noso chamado.

Seguímonos encontrando na lectura da túa nova novela recentemente publicada e que trouxemos como delicado agasallo teu,  ben característico da túa xenerosidade.

MISTERIO DESVELADO!!!

Preguntabamos hai uns días por onde andaba unha parte do noso club de lectura fóra do centro e en horario extraescolar...

Pois velaquí tedes a resposta gráfica...

... e o testemuño sonoro neste enlace directo ao programa "A fume de carozo" que gravamos en RADIO CUAC FM na tarde do pasado martes.

Que opinades da estrea do noso equipo locutor?

Va que merecen todos os nosos parabéns Carmen Antelo, Soraya Mato, Ana Rodríguez, Samuel Abelenda e Elena Rey ?

EXTRA, EXTRA!

A vida ao redor deste noso club de lectura non deixa de medrar e unha nova póla irmá acaba de nacer.

Verónica e Lucía decidiron lanzarse ao mundo virtual para partillar connosco as súas lecturas. E non chegan soas, senón que teñen un gran equipo de colaboradoras!!!

Onde? Como? De que xeito? Toda a información aquí, no seu blog de crítica literaria: E ti que les?

Feitas as presentacións de cortesía, cederémoslle o paso ao seu espazo ben destacado na marxe esquerda desta nosa casa común Coristranca.

Benvidas!!!!

VISITA Á CASA MUSEO DE MANUEL MARÍA

Unha sección do noso club de lectura de centro participou na ofrenda poético-floral que realizamos a Manuel María no cemiterio de Outeiro de Rei, antes de visitarmos a recentemente inaugurada Casa Museo. 

Unha xornada de descubertas emocionantes na biblioteca desta casa como foi poder ler a copia facsimilar do xornal A Nosa Terra ou da Revista Nós.