REPORTAXE TERTULIANA

Chegou unha nova tertulia na sección do club de lectura de 1º e 2º de ESO, aínda que con algunhas pequenas baixas "temporais". De novo acompañáronnos as historias de lobos. Houbo quen gozou máis e quen menos coa lectura de Pel de lobo. Mesmo aqueles que non deron rematado a lectura, quedaron con ganas de continuala, porque, como puidemos comprobar, o final tan emocionante e sorprendente agóchase nas últimas páxinas.

Ademais da parola, tivemos a oportunidade de ler un pequeno texto autobiográfico dun home ao que de nono, nas terras de Vimianza, un lobo pegou trinta e tres trabadas no pescozo. Non dabamos creto de que estas situacións tamén se puidesen dar máis aló dos libros e das historias que neles se contan. Grazas á profesora Rosa Rial por nos ceder esta hstora que ela conserva coma un tesouro!

E xa andamos metidos na próxima lectura!!! Desta volta enredaremos con piratas!!!

CHAMÁDEME SIMBAD

Este é o novo título que temos xa entre mans no noso club de lectura de 1º e 2º de ESO. 

Xa hai quen empezou a lelo. Es ti unha desas persoas? 

Caeches xa na aventura de Simbad?

Cóntovos un segredo? Francisco Castro, o creador desta fermosa novela, agasallaranos coa súa visita!!!

BICENTENARIO DE CHARLES DICKENS

Este autor, que ambientou a inmensa maioría das súas novelas no Londres do século XIX, non dubidou en acometer a función social do seu oficio para, nesta cidade florecente, criticar a súa pobreza, as duras condicións laborais, o analfabetismo e os problemas hixiénicos e sanitarios que causaban estragos na poboación.

Aproveitando esta efeméride, lanzamos unha recomendación lectora deste autor referencial na narrativa do século XX: Oliver Twist.

Nesta novela, publicada por entregas entre 1837 e 1839, nárrase a historia dun orfo abandonado nun hospicio e empurrado logo á mala vida. 

Non vola perdades!

PRÓXIMA TERTULIA LITERARIA

O vindeiro mércores 8 de febreiro reunirase novamente a tertulia literaria de 1º e 2º de ESO.

Vémonos na biblioteca! E preparádevos porque imos coñecer de primeira man algunhas historias verdadeiras protagonizadas polos lobos!!!

Polo de agora, ímoslle botar un conto que se titula: 

O gaiteiro e os lobos

Era unha vez un gaiteiro que viña xa de tarde pola fraga dispois dunha parranda, e como tiña  moito sono deitouse nunha pila de folla. Durmiuse, e estando durmido veu o lobo, oliscouno, e tapouno un pouco cas follas pensando quizais en voltar deica logo cos compañeiros.

O noso homiño, que se despertara ao sentir vir os lobos, subiuse a un carballo.
Viñeron os lobos e empezaron a fozar na folla, pero como non no atoparon, empezaron a pelexar co que os chamara.
Nesto que o noso gaiteiriño vendo a pelexa que tiña os seus pes, empezou a acerretar pra que lle seguiran zoupando o lobo que o descobriu, pero velaí que cando se dan de conta que o carallo da cea estaba no carballo, deixaron a pelexa e empezaron a roelo carballo. Mais cando o carballo xa ía a cair, o gaiteiriño pasou polas gallas a outro carballo.

Empezaron os lobos con mais fame aínda a roelo tamén. Pero agora xa non había outro pra facer o mesmo de antes. Ao darse conta, o homiño disto dixo.

- Me cago no mundo, si hei de morrer... que sexa tocando.

E empezou a tocar na gaita. Non se sabe como, pero en canto a gaita empezou a berrar, fuxiron os lobos coma se oisen as galochas do demo. O noso gaiteiro baixouse do carballo sen deixar de tocar a gaita, e tocando sen parar nin un momento chegou á aldea.

Dende entón os desta parroquia cando teñen que ir polo monte e non teñen armas levan a gaita.

TERTULIA LITERARIA ENTRE LOBOS

Si, si, ledes ben, os lobos acompañáronnos na lectura de Pel de lobo, mais tamén na nosa tertulia do segundo ciclo, grazas ás lembranzas que a profesora Rosa Rial garda da súa infancia de testemuños vivos de xente que viu o lobo. Quedamos moi sorprendidos sobre a súa capacidade de resistencia e intelixencia para traballar a xente, como se di popularmente.

E vós que contades? Vistes o lobo? Viuvos o lobo?

E FALANDO DE LOBOS...

... o máis grande contador de historias de lobos é o narrador galego Ánxel Fole. Para convidar á descuberta da súa lectura, velaquí esta adaptación dun seu conto titulado "Os lobos", incluído no libro de relatos Á lus do candil.