terça-feira, 27 de dezembro de 2016

DESPEDIDA LECTORA

Non podía haber mellor despedida desta primeira avaliación para o noso club de lectura que unha gran quedada lectora na nosa biblioteca.

Compartimos libros e experiencias vividas ao redor de lecturas tan diferentes como Ámote Leo A., A cabeza de Medusa e Cartas de inverno. E de sobremesa tamén compartimos algunha larpeirada, claro!

Desde Coristranca, desexámosvos bo nadal, mellor aninovo e estupendas lecturas. E non esquezades que os Reis Magos saben ler, así que pedídelle moooooooitas suxestións de novos títulos!!!



domingo, 18 de dezembro de 2016

PRIMEIRA EXPERIENCIA BOOKTUBERS

O noso club de lectura gusta moito de experimentar e innovar, así que pensou en dar o salto á gran pantalla!!!

Iniciamos, da man de Antía e Esperanza, esta nova experiencia como booktubers a partir da lectura que fixemos conxuntamente da novela de María Reimóndez, A dúbida.






Seguro que atopades pistas de lectura interesantes, mais non esquezades que nunca se conta todo...

Convidadas quedades!

quinta-feira, 8 de dezembro de 2016

DE QUEDADA LITERARIA

O club de lectura de 2º ESO inaugurou a súa tempada de quedadas literarias este mércores pola tarde. A novela de Ledicia Costas, Unha estrela no vento, foi o preámbulo para unha tertulia intensa após unha lectura que non deixou indiferente a ningún membro deste equipo lector.

En breve traerémosvos algunhas pistas de lectura para que ninguén perda os fíos intrigantes e sorprendentes desta magnífica novela.


sexta-feira, 25 de novembro de 2016

25N, DÍA CONTRA A VIOLENCIA MACHISTA


Neste día que nos lembra a importancia de sermos conscientes sempre da importancia de detectarmos alertas de ataques, acosos e violencia contra as mulleres, mesmo dentro dos círculos máis próximos e íntimos, a escritora María Reimóndez ofrécenos este relato "A esencia da cidade" para a reflexión.

quinta-feira, 17 de novembro de 2016

CHEGOU O DÍA!


Este mércores 16 de novembro vai ser difícil de esquecer, xa que tivemos a sorte de poder coñecer persoalmente e conversar devagar coa escritora María Reimóndez, autora da novela A dúbida que tanto nos gustou e fixo pensar e repensar ese mundo escuro e silente, mais moi presente na sociedade que nos rodea, dos abusos sexuais a menores.

Sempre se di que a lectura é unha viaxe e abofé que esta o foi e non metaforicamente.

En Coristranca gustamos de nos deixar acompañar pola lectura e os libros aló onde imos e descubrir novos espazos e amizades canda eles. Así que aló nos fomos á Coruña, á estupenda libraría Moito Conto, onde nos recibiu a libreira Esther, e mantivemos unha novidosa tertulia con María Reimóndez.


Non puideron estar todos os membros do club de lectura de 4º ESO e ben que os estrañamos, mais prometemos contarlles (case) todo o que vivimos nesta tarde, mais xa en diferido :D

Ah! E por primeira vez conseguimos sumar ás habituais lectoras, alumnas e profesoras, unha nai. Benvida, Esperanza!



Deica a próxima, María! Seguirémoste entre liñas!

Prepárate, Esther! Volveremos por Moito Conto!

terça-feira, 15 de novembro de 2016

ÁS PORTAS DO ENCONTRO CON MARÍA REIMÓNDEZ


A tertulia da pasada semana ao redor da novela de María Reimóndez, A dúbida, soubo a pouco. 

É por iso que na tarde deste mércores manteremos un encontro coa autora na libraría coruñesa Moito Conto, para aprofundar aínda máis nas claves persoais da escrita dunha obra destas características en que o silencio ao redor dos abusos sexuais segue a estar demasido presente na sociedade que vivimos.



Para quen aínda non leu A dúbida, adiantamos esta recente entrevista á autora.

Seguiremos informando...

terça-feira, 8 de novembro de 2016

TERTULIA E ACCIÓN!


Chegamos ás vésperas da primeira tertulia literaria do curso.

Quen será o libro protagonista? Quen o asina? E os ollos lectores?

Imos ir deixando algunhas faragullas por aquí para ir alimentando o camiño deica o vindeiro xoves...

CONTINUAMOS A MEDRAR...

Hoxe inicia a súa andaina lectora unha nova sección dentro do club de lectura do centro e desde aquí querémoslle dar a benvida.


Os novos membros de 1º de ESO inician esta travesía de lectura comunitaria entre liñas partindo dunha estación moi esixente coa novela Cartas de inverno de Agustín Fernández Paz, neste momento en que precisamente Edicións Xerais publica unha edición especial (a número 36) que conmemora os 100.000 exemplares vendidos.


sábado, 29 de outubro de 2016

O TOP DE LECTURAS


Xa coñecemos cales foron as lecturas favoritas dos clubs escolares galegos.

Seguro que nos recoñecemos nalgúns deses 50 títulos preferidos ao longo do curso pasado.

Unha boa guía orientativa, sen dúbida, para as propostas deste curso que xa iniciamos nos diferentes grupos do noso club: 

Coristranca, a lectura con retranca:  

A dúbida, de María Reimóndez

Ámote Leo A, de Rosa Aneiros

Unha estrela no vento, de Ledicia Costas.

XA CHEGA O SAMAÍN

A piques de entrar no propio día do Samaín, rematamos a semana intensiva de lecturas de medo coa sesión dirixida ao alumnado de 3º e 4º de primaria.



Zombis, esqueletes e vampiros puxéronnos medo e tamén nos deron que rir grazas ás boas lecturas de tres compañeiras do club de 3º ESO.



E, como non, se abriamos o luns a primeira sesión escoitando o medo na voz de Agustín Fernández Paz, tamén quixemos rematala coa lectura do seu libro Que medo, mamá Raquel!

 

quinta-feira, 27 de outubro de 2016

MÁIS LECTURAS DE MEDO COMPARTIDAS


Como cada día desta semana, dedicamos o primeiro recreo  á lectura de relatos ou extractos de novela que nos acompañan no medo, o terror, a tensión...

Este martes foi a quenda de Nuria, que puxo voz ao relato gañador no certame de microrrelatos de medo do curso pasado (da autoría de Ana Rodríguez, que xa voou para outros lares educativos...), e mais de Marta, Patricia e Nerea, que nos aproximaron aos mundos da intriga de tres novelas fascinantes.







Reparade ben nos títulos que elas escolleron como propostas de próximas lecturas.

quarta-feira, 26 de outubro de 2016

SEGUIMOS A MEDRAR!


Este martes comezou a nova sección do club de lectura de 2º ESO. 

Benvida para este novo equipo lector que abre experiencia coa novela de Ledicia Costas, Unha estrela no vento.

Aló imos! En breve contarán como lles foi por estas páxinas!!!

segunda-feira, 24 de outubro de 2016

LUNS DE MEDO

O Club de Lectura Coristranca agradece a visita de todo o alumnado que hoxe asistiu á primeira xornada de contos de medo compartidos.


Da lectura do relato "A visita" de Xohán Casal coa lembranza de Agustín Fernández Paz á escoita do texto gañador do concurso de relatos de medo na convocatoria do curso pasado na voz da súa autora, María Blanco de 2º B.



Que sorpresa levaremos mañá martes?

domingo, 23 de outubro de 2016

RECREOS ENTRE LIÑAS

Esta semana, previa á chegada do Samaín, as participantes no club de lectura colaboran co EDLG no programa de lecturas de medo compartidas co alumnado na biblioteca de secundaria  e deslocaranse tamén ao punto de lectura de primaria para participar da súa Hora de Ler.

Abrirá a quenda da contada o noso querido escritor e amigo do centro, Agustín Fernández Paz, a quen lembraremos no noso día a día de xeito especial durante este trimestre.


24 DE OUTUBRO. DÍA DA BIBLIOTECA


Por iniciativa da Asociación Española de Amigos del Libro Infantil y Juvenil, desde 1997, en colaboración co Ministerio de Educación, Cultura e Deporte, celébrase o Día da Biblioteca, co obxectivo de concienciar a sociedade da importancia da lectura e como homenaxe e recoñecemento ao labor dos/as bilbiotecarios/as.

Este ano, as autoras seleccionadas para a redacción do pregón e o deseño do cartel que se difunde foron as gañadoras do Premio Nacional 2015, a galega
 Ledicia Costas e a éuscara Elena Odriozola.

Celebraremos este día inaugurando a semana de lecturas de medo compartidas nos primeiros recreos de cada xornada, coincidindo co plan de actividades coordinado desde o ENDL e apoiado polos clubs de lectura do centro.

segunda-feira, 17 de outubro de 2016

CONTINÚA A NOSA XIRA DE PRESENTACIÓN

Antía, Nerea e Patricia, lectoras experimentadas do noso club, seguen coa súa xira de presentación do proxecto Coristranca e hoxe tocoulle a 2º B na aula de música, coa colaboración da profesora da materia (e tamén fotógrafa), Pilar Espido, como compañeira de lecturas.

Á vista deste primeiro encontro, a imaxe non engana... o novo club de 2º ESO tamén promete!!!

Atentas ás súas pantallas!!!


domingo, 16 de outubro de 2016

CLUB D@S EX-

Álvaro Antelo achéganos como proposta literaria para gozar dun bo tempo lector a obra poética de Lois Pereiro e cóntanos o seu proceso de descuberta deste poeta tan senlleiro, voz lírica única.

Grazas, Álvaro, por partillares connosco a túa emoción lectora e a complicidade que sentes na túa propia escrita poética con Lois Pereiro!






Escribir sobre Lois Pereiro sempre é un reto, ademais unha honra. Tiven a sorte de saber del cando cursaba estudos secundarios, mais a miña ignorancia naquel entón impediume achegarme a el. Anos despois, xa en bacharelato, din con el na biblioteca e (re)descubrín ao poeta que supuxo un punto de inflexión. 

Hai estrelas que logo de mortas seguen presentes, así é a poesía de Lois. Un raio no medio da treboada, ou máis ben un amencer literario. A intensidade da súa obra é tal que a día de hoxe segue a ser un dos referentes para as novas xeracións de escritores; entre os cales, humilde pero satisfeito me atopo eu.

O primeiro que sentín ao ler os seus poemas foi frío. Esa é unha das primeiras impresións que causa Lois, as súas verbas rachan no silencio. Abonda abrir Poemas 1981/1991 e ler o primeiro poema para darse conta de que non estás ante outro poeta calquera. Esa é unha das grandes virtudes da súa voz poética: a personalidade, a potencia coa que falaba. Dicían que Lois era o poeta anarquista; eu sempre penso que era pola valentía coa que escollía as palabras. Cando el escribía, a poesía asentía e calaba. 

Outra faceta da súa literatura é o intimismo tan potente dende o que escribe. Tal vez o seu primeiro poemario sexa unha obra máis metálica e punzante, como as agullas irónicas das que falaba; mais en Poesía última de amor e enfermidade a voz de Lois vólvese moito máis interna. Os poemas amósanse baixo unha atmosfera moi poderosa. É aí onde o poeta se fai humano.

Manuel Rivas dixo nunha ocasión que as palabras de Lois eran tan verdadeiras que semellaban pecado. Eu vou máis aló: as palabras de Lois son pecado, vida e morte; son a furia necesaria, o futuro alleo, a enfermidade, a irreverencia; son modestas proposicións para facer que deixen de xirar as portas; luces e sombras de amor... Especialmente amor. As palabras de Lois eran amor que resucitou ilimitado. "Contra a morte o amor que vai comigo" dicía nun dos seus poemas. Se teño que recomendar un poeta, sempre será Lois. Contra a morte os versos de Lois que van comigo.
                                                     
Admiro moitas cousas de Lois Pereiro. A súa valentía para afrontar a morte e plantarlle cara. A súa breve pero intensa literatura e a poderosa voz coa que a creou. Mais se hai algo que admiro de Lois é o seu espírito inconformista e rebelde, o seu anarquismo atroz e a súa negación a renderse. Desfruto do poeta, mais admiro a persoa.
"Permitirías ti, amor deserto, que nesta febre penitente abrise a derradeira porta e a pechase detrás miña, sonámbulo e impasible, ou porías o pé entre ela e o destino?". Eu si o poñería.

CLUB D@S EX-


Continuamos este curso enriquecendo a nosa sección de encontro literario co Club d@s Ex-.

A primeira en voltar a este recuncho para o reencontro é Ana Seoane, que nos ofrece unha ben suxestiva lectura: As voces baixas de Manuel Rivas.

Todo un convite á lectura! 

Grazas, Ana!!!

María, a irmá do  narrador, é o fío condutor dos diferentes capítulos que constitúen As voces baixas, de Manuel Rivas. 

O autor, con esta obra, achéganos aos recordos da súa infancia e ás persoas que formaron parte dela, ademais de recrear os distintos puntos da cidade da Coruña da época. Nas diferentes pasaxes do libro pódense apreciar os recordos e a melancolía do protagonista, pero sobre todo resalta a retranca galega do escritor.    


Desde logo trátase dun exemplar  distinto, que non engancha desde o primeiro capítulo pero que esperta grande curiosidade no lector/a, o/a cal desexa saber máis. 

Chegando ao final dos relatos é máis doado comprender a historia completa. Polo tanto, recomendo que se faga unha lectura calmada e gozar da mesma.

Convídovos a que investiguedes quen son as voces baixas ás que se refire o autor na obra.  

sexta-feira, 14 de outubro de 2016

PRESENTANDO O NOSO CLUB


Cada curso Coristranca medra, igual que as amigas e amigos da lectura que o alimentan. 

Por iso hoxe Antía, Nerea e Patricia, lectoras experimentadas de 4º de ESO, presentaron o mundo de Coristranca ao alumnado de 2ºA que aínda non o descubrira.

Toda unha aprendizaxe de descubertas varias que estamos ben seguras en breve iniciarán o voo.

terça-feira, 11 de outubro de 2016

CON MANUEL MARÍA

Continuamos lendo a Manuel María máis aló da celebración do Día das Letras Galegas e partillando as escollas poéticas do noso club nos corredores do centro.

Grazas, Adriana e Alba, por atraernos ás vosas lecturas!




segunda-feira, 10 de outubro de 2016

NA LEMBRANZA DE AGUSTÍN FERNÁNDEZ PAZ

O pasado 12 de xullo o descanso do verán desacougaba coa nova da perda física de Agustín Fernández Paz, un autor referencial para o tempo lector do noso centro e, moi especialmente, para os nosos clubs de lectura.

Durante os últimos cursos, Agustín Fernández Paz foi sempre un autor amigo de Coristranca. 

Imposíbel esquecer as entrevistas telefónicas do noso equipo de radio en diferentes programas "A Fume de Carozo". Ou aquel encontro que por fin chegou na primavera de 2015 na Fundación Penzol de Vigo.

Ao longo deste trimestre, Coristranca homenaxeará Agustín para lembrar a amizade e o afecto pola lingua, pola cultura, por nós mesmas, canda el aprendido.

Seguimos véndonos entre liñas na túa inmensa obra, benquerido Agustín!


CON LEDICIA COSTAS ATÉ A COCIÑA





Escarlatina e Esmeraldina son dúas personaxes literarias de primeira grazas á man da súa creadora, a escritora viguesa Ledicia Costas, unha autora ben coñecida no noso club de lectura.
Agora podemos saber algo máis da propia Ledicia Costas e das súas creacións literarias que teñen un arrecendo culinario ben suxestivo.

Desde o blob Bolboretas no bandullo, imos entrar coa súa sección de cultura gastronómica até a cociña de Ledicia Costas. 

Vindes?

quarta-feira, 5 de outubro de 2016

33 RAZÓNS PARA LER MÁIS


Velaquí algunhas razóns que convidan a ler, segundo Victoria Fernández, directora da Revista CLIJ (Cuadernos de Literatura Infantil y Juvenil).


  • Para vivir máis 
  • Para deter o tempo 
  • Para saber que estamos vivos
  • Para saber que estamos sós
  • Para aprender 
  • Para aprender a pensar
  • Para descubrir o mundo
  • Para  coñecer outros
  • Para coñecer aos outros
  • Para coñecernos a nós mesmos
  • Para compartir un legado común
  • Para crear un mundo propio
  • Para rir
  • Para chorar
  • Para consolarnos
  • Para desterrar a morriña
  • Para  ser o que somos 
  • Para non ser o que somos 
  • Para dubidar 
  • Para negar 
  • Para afirmar 
  • Para fuxir do ruído 
  • Para combater a fealdade 
  • Para refuxiarnos 
  • Para evadirnos 
  • Para maxinar 
  • Para explorar 
  • Para pasalo ben 
  • Para soñar 
  • Para medrar 

    Cales son as túas?

sábado, 1 de outubro de 2016

CORISTRANCA EN PLENA ACCIÓN LECTORA!

Xa chegan as primeiras lecturas do noso club. 

Queredes saber cales son? 

Pois velaquí están os primeiros títulos seleccionados polos equipos lectores de 3º e 4º de ESO


segunda-feira, 26 de setembro de 2016

MENÚS LITERARIOS PARA BOOKTUBERS

Até agora, neste blog recollemos moitas reseñas literarias escritas, de membros participantes nas diferentes seccións do club de lectura e tamén do noso famoso Club d@s Ex, que segue a partillar connosco os seus títulos preferidos.

Mais este curso agárdanos unha nova que ha dar que falar e, sobre todo, que ver!!!

Xa sabedes o que son os booktubers? Pois atención, porque en Coristranca non nos imos resistir á tentación de nos colocarmos diante da pantalla para falar de libros.

Quen será a primeira? Sorpresa!!!

Imos deixarvos un petisco con esta especial recensión da obra de Sechu Sende, Made in Galiza.


LETRAS DE BENVIDA!


Comeza un novo curso escolar, que tamén ha volver ser lector, no CPI Alcalde Xosé Pichel. 

Coristranca xa está prendendo motores para volver facer moito ruído de páxinas e de palabras.

Atención ás súas pantallas, aos corredores, ás aulas, á Biblioteca...

En breve, moitas máis novas. 

Iniciamos a conta atrás...

domingo, 3 de julho de 2016

LECTURAS DE VERÁN

Enchemos a mochila do verán con novas lecturas e para iso tomamos prestada esta completa exposición de animación á lectura elaborada pola veciña Biblioteca e o EDLG do CPI As Revoltas.

Cantas caras coñecidas imos atopar por aquí! Menudas sorpresas que nos dá a lectura!


sexta-feira, 1 de julho de 2016

CHEGOU A HORA DA DESPEDIDA

Aí vos vai a derradeira entrada deste curso cunha sorpresa gráfica.

Xa temos logotipo, a nosa propia imaxe para sermos aínda máis coñecidas como comunidade lectora dentro e fóra do CPI Alcalde Xosé Pichel, grazas ao deseño creativo da artista carballesa Laura Tova.

Agardamos que vos preste e que nos acompañe sempre nas nosas lecturas de verán.

Deica setembro! Bo verán! Quedamos entre liñas!


terça-feira, 21 de junho de 2016

QUEN SON AS AUTORAS E AUTORES MÁIS LIDOS NOS CLUBS DE LECTURA?

Como todos os cursos, a asesoría de bibliotecas escolares recompila as autoras e autores máis lidos nos clubs de lectura galegos.

Seguro que vos soan moito algúns deses que ocupan os primeiros postos, non si?



quarta-feira, 1 de junho de 2016

ALÓ FOI O INTERCAMBIO...

Logo de varios meses traballando con este horizonte a través do intercambio epistolar cos compas do IES Otero Pedrayo da Coruña, chega por fin o día do noso encontro físico e non dura nadiña...

Cadaquén trae consigo as súas lembranzas persoais, as súas fotos, os seus contactos virtuais, mais Patricia Varela, intrépida profesora acompañante do noso centro amigo, preparounos este petisco audiovisual para non esquecer nunca unha xornada irrepetíbel e tamén para dar moita envexa a quen non puido vir.

A ver como lle agradecemos ao equipazo do club de lectura e mais do ENDL do IES Otero Pedrayo  tanta hospitalidade e tanto traballo organizativo para unha xornada que sempre fica en nós. Aínda habemos ter que repetir para o curso próximo e corresponder como merecen! Que vos parece?


domingo, 8 de maio de 2016

NOVO PROGRAMA RADIOFÓNICO XA NA ONDA!

O pasado martes 5 de maio emitimos ao vivo o que xa foi o noso último programa en Radio Cuac FM. Unha mágoa, mais xa sabemos que todo o bo sempre acaba ben cedo!!!

Miriam, María e Nuria, da sección do club de lectura de 3º ESO, prepararon un completísimo guión que nos lembrou o ben que o pasaran na celebración do Correlingua, esa mesma mañá, polas rúas da Coruña, algunhas das súas propostas para un completo menú lector e a lembranza de dúas efeméredes que estamos a celebrar neste 2016: o centenario das Irmandades da Fala e mais a homenaxe a Manuel María como autor destacado neste vindeiro Día das Letras Galegas.



Non faltaron as entrevistas, non. Desta volta, por partida dobre: unha a Ledicia Costas e outra a Mercedes Queixas. De que andarían a falar?

Non podemos descubrir nada, nin sequera a oferta degustación musical tan variada, así que mergullade por estas ondas virtuais e volvede cantas veces queirades escoitar o estupendo programa deste gran equipo radiofónico.


Un aplauso grande para María, Nuria e Miriam!

segunda-feira, 2 de maio de 2016

MANUEL MARÍA NO DÍA DO LIBRO

Este pasado 23 de abril celebramos o Día do Libro cunha lectura colectiva da obra de Manuel María, o poeta que estamos a descubrir neste curso co gallo da celebración do vindeiro Día das Letras Galegas na súa honra.

Vivimos un acto que nos transmitiu a riqueza e a diversidade da obra poética do autor, grazas ás voces de alumnas do club de lectura e colaboradoras do EDLG.

Grazas a todas pola vosa participación na lectura, a través da vosa voz e da vosa escoita!