quarta-feira, 19 de dezembro de 2018

DE TERTULIA EN TERTULIA

Hoxe concluímos esta primeira rolda de lecturas trimestras con cadanseu encontro.

Nesta ocasión, o club de lectura de 2º ESO conversou arreo sobre as impresións e emocións múltiples que naceron a partir da lectura d´O corazón de Xúpiter de Ledicia Costas.

E como non hai tempo que perder, comezamos xa nova viaxe a través das páxinas de Europa Expréss, da autoría de Andrea Maceiras.

Vémonos á volta do aninovo!


TERTULIANEANDO


Despedimos este primeiro trimestre lector coa tertulia de 3º e 4º ESO ao redor da lectura d´A dúbida de María Reimóndez que cede paso agora ao encontro con Futuro imperfecto de Xulia Alonso.

Bo Ano Lector 2019!

terça-feira, 18 de dezembro de 2018

RESEÑEANDO

Lucía Bermúdez (3º ESO) achéganos a súa proposta lectora para este tempo de descanso de nadal.

A ver que vos parece? Para ler sen medo...


CANDO CAE A LUZ, MARÍA CANOSA


Cando cae a luz é un libro de historias de medo. Foi escrito por María Canosa e recolle trece pequenos relatos de terror. Son contos con moita intriga propios para o Samaín ou para contalos xunto á lareira coa familia. Recoméndolle este libro a todas esas persoas ás que lles gusten as historias de medo e de intriga.

segunda-feira, 3 de dezembro de 2018

ESTREANDO TERTULIA

Non puido comezar os encontros tertulianos con máis forza e ilusión este equipazo de 1º de ESO que moitas e boas lecturas prometen.

Con emoción e sentimentos encontrados partillaron impresións ao redor da lectura de Engurras.

Agora xa están devorando as liñas doutra historia ben intrigante: O neno inverno de María Canosa.

Seguide en antena porque seguiremos informando!!!


sábado, 10 de novembro de 2018

MÁIS PRESENTACIÓNS


E por fin chegamos á última presentación deste curso para lle dar a benvida por primeira vez ao club de lectura aos compañeiros e compañeiras de 1º ESO.

Con toda a forza ilusionante da estrea, comezamos coa lectura de Engurras, de Paco Roca!

Xa vos contaremos...

quinta-feira, 1 de novembro de 2018

ANAGNÓRISE

O recoñecemento foi o fío condutor desta primeira tertulia do club de lectura de 3º e 4º ESO.


Recoñecemento de nós propias a partir de Xulia e Nicolau, os protagonistas cuxa relación en tránsito vai debullando María Victoria Moreno na novela que nos reencontrou literariamente por primeira vez este curso: Anagnórise.




  Unha tertulia fecunda en palabras, impresións e sorrisos compartidos, non si?

PRESENTÁNDONOS ( E II)

Continuamos coas presentacións das seccións do club e esta semana tocoulle a quenda ao lectorado de 2º de ESO.



Sempre é difícil comezar a escoller lectura, mais desta volta tivémolo claro moi axiña, así que decidimos irnos polas nubes con...

 O corazón de Xúpiter de Ledicia Costas



Vémonos axiña na nosa primeria tertulia deste ano, aínda que agora con toda a experiencia lectora, pois xa non somos os novatos do insti como o curso pasado...

Iremos contando...

TEMPO DE SAMAÍN EN PALABRAS


Chega o tempo de Samaín e recuperamos a nosa tradición de contar historias de medo aos máis peques do centro, desde 1º até 6º de educación primaria.



É sempre un pracer compartir lecturas convosco. 

Encantaríanos reencontrarnos entre liñas. Volvede axiña!!!






terça-feira, 16 de outubro de 2018

PRESENTÁNDONOS...

Feitas as presentacións no noso espazo favorito do instituto, o supersofá laranxa da biblioteca, facémolas agora públicas.

Con todas vós, velaquí o magnífico club de lectura de 3º e 4º ESO!!!

Comezamos a compartir a primeira lectura, unha gran novela dunha grande escritora que este ano 2018 deu moito que falar... e aínda dará!!!

De que e de quen estamos a falar???????


domingo, 14 de outubro de 2018

VOLTAMOS!!!

Aquí estamos de novo outro curso máis e xa van...

Renovamos unha parte do lectorado curioso, estrañamos a quen se nos foi dando novos pasos na súa vida persoal e académica e saudamos a todos os novos membros que xa bateron na porta do club de lectura "Coristranca, a lectura con retranca".



Este luns comezamos coas presentacións!!!

Isto comeza ... xa!!!

domingo, 1 de julho de 2018

VOLTAMOS O VINDEIRO CURSO!

Bo verán e felices lecturas!!!!


DESPEDIDA DE XABIER P. DOCAMPO

Pechamos este curso coa triste nova da despedida física do escritor Xabier P. Docampo. 

Facemos nosas as súas palabras: 

Sen dúbida, o acto máis sublime de amor que eu coñezo é contar unha historia.

Procurarémolo en cada nova lectura e relectura da súa importante obra porque os escritores e as escritoras sempre permanecen para sempre na súa escrita.


domingo, 10 de junho de 2018

PROSEGUIMOS COA FIN DE CURSO TERTULIANA

Desta volta co equipazo de 2º ESO despedimos o curso cunha lectura pioneira, con protagonistas fundamentais da historia que descoñeciamos e coas que non contabamos.

Queredes saber cal destas mulleres pioneiras se foi convertendo no modelo e referente escollido por cada membro do equipo lector?

Atentas ás súas pantallas...


quinta-feira, 7 de junho de 2018

DESPEDIMOS AS TERTULIAS

Imos pechando os encontros lectores e conversadores. Hoxe tocoulle o turno ao club de 1º ESO que este ano estrearon experiencia e ameazan con continuar o curso próximo!!!!!

A súa lectura escollida foi O neno inverno de María Canosa. A ver se se animan a deixarnos por aquí algunha pista ...


segunda-feira, 4 de junho de 2018

LENDO LENDAS

Despois da lectura dalgunhas das lendas da nosa comarca bergantiñá, cumpría percorrer in situ os espazos reais mencionados na recompilación lendaria da autoría do especialista e exprofesor do noso centro Xan Fernández Carrera.

Fantástica xornada para gozar e saber do noso. Iso si, sempre coa pregunta no aire: "E sería verdade ou non...?

sábado, 2 de junho de 2018

INTERCAMBIO CO IES OTERO PEDRAYO

Renovamos un curso máis o noso intercambio co IES Otero Pedrayo da Coruña e aínda que non podemos recoller todas as vivencias desta intensa xornada compartida en Betanzos, por aquí vos deixamos algunhas imaxes que queren ser de recoñecemento e gratitude por tan impecábel organización.

Deica o curso vindeiro! Continuamos entre lecturas!




quinta-feira, 26 de abril de 2018

MEDRANDO CO CLUB D@S EX!

Antía Varela volve connosco para compartir coa súa palabra a súa última lectura, Chamando ás portas do ceo de Jordi Sierra i Fabra.

Reparade na súa opinión porque seguro que non vos resistiredes a esta proposta lectora!

Se tivese que definir a Silvia con unha palabra, sería: Especial, porque é unha desas persoas que te namoran simplemente coa súa presenza e o xeito de pensar.

Grazas a ela coñecemos a beleza e a pobreza que rodea á India, con ela vives o día a día no hospital e coñeces a moitos pacientes que te marcan, non só polo agradecemento e a ilusión que mostran cando ela os axuda, senón tamén pola forza que ainda lles queda.

Nesta novela mestúrase a aventura coa desgana, o amor coa desilusión, a fermosura coa pobreza, pero o máis importante é que o medo se converte en superación.

Convídovos a coñecer a India a través dunha historia que vos vai deixar cautivados.

segunda-feira, 23 de abril de 2018

TOMAMOS A PALABRA


Todos os días son óptimos para as nosas tertulias, mais hoxe coincidiu con unha desas datas sinaladas no calendario: o Día Internacional do Libro.

O noso punto de encontro recibiunos para a tertulia do club de 2º ESO ao redor dunha obra que gustou e, sobre todo, sorprendeu: O corazón de Xúpiter, de Ledicia Costas.



Precisades algunhas razóns para a ler? Pois velaquí algunhas pistas orientadoras...

1. Axúdache a abrir os ollos cara ás redes sociais (Rosa)
2. Axúdache a non confiar naquelas persoas que só coñeces a través das redes sociais e poden non ser como din (Lucía)
3. Axúdache a abrir os ollos ante o que che di unha amiga, aínda que sexa contrario á túa opinión (Naihara)
4. É moi entretido e axúdache a non confiar nas redes sociais e ter coidado co que publicamos (Yovanna)
5. É moi bonito e axúdache a aprender (Ivanna)
6. Axúdache a non confiar en quen non debes (Valentina)
7. Aprendes que non todo é o que parece (María Pazos)
8. Hai que facerlle caso aos consellos dos amigos e non confiar tanto nas persoas que non coñeces (María Varela)

FELIZ DÍA DO LIBRO 2018


terça-feira, 27 de março de 2018

RESEÑEANDO... ENGURRAS

Esperanza Muñiz non nos puido acompañar na última tertulia, mais envíanos a súa impresión lectora sobre Engurras para compartir connosco desde as súas experiencias vitais coa avoa Martisa. Que sorpresa!!!!



Como me gustaría estar con vós na xuntanza do club para falar deste libro!

Queríavos contar que coñecín unha señora á que lle chamabamos "avoa Martisa". Vivía soa con 90 anos, sempre foi unha muller con forte carácter e nunca quixo axuda de ninguén, nin sequera dos servizos sociais.

A avoa Martisa esqueceu como se cociñaba, pero sabía que o mellor aceite era o "Carbonell" e o mellor viño o "Campo Viejo".



A avoa Martisa esqueceu que para ouriñar de noite había que ir ao baño e facíao directamente na alfombra e, pola mañá, ao poñer os pés nela e atopala fría coma a lama, choraba porque algún mal cristián lla fora mollar.

A avoa Martisa esqueceu que para ver precisaba lentes, pero ela recitaba sen tatexar:

Se me dás o que che pido
non che hei de pedir a vida, 
da cintura para abaixo,
da rodilla para arriba.

Unha noite a avoa Martisa escoitou voces e subiu buscar quen lle falaba... co risco de perderse ou morrer de frío. 

Tamén acabou nunha residencia coma Emilio. Soa.

quarta-feira, 21 de março de 2018

PALABRAS NADA ENRUGADAS

O club de lectura de 1º ESO renovou o tempo de xuntanzas de comezo da primavera. Nesta ocasión foi protagonista a lectura de Engurras, unha historia en banda deseñada que non nos deixou indiferentes.


segunda-feira, 12 de março de 2018

E VEÑAN MÁIS PALABRAS AO CLUB D@S EX!

Recibimos unha nova compañeira de viaxe virtual agora que xa non a temos connosco no centro: Nerea Fernández. Benvida!!!

Para esta primeira colaboración, Nerea preséntanos unha obra ben coñecida, escrita por Xabier P. Docampo, O misterio das badaladas.

Ollade para as súas impresións lectoras que son porta para abrir á descuberta dunha historia ben misteriosa e curiosa...



Gustoume moito a idea de que as ex-alumnas seguisen participando no Club. Como eu tamén son unha delas, aquí vos deixo un libro magnífico de Xabier P. Docampo titulado O misterio das badaladas

Como o propio título di, esta historia trata dun reloxo que se acaba de poñer en marcha e as súas badaladas son exactas, doce badaladas, pero ás doce da noite dá trece! 

Como pode ser posible? 

Se queredes axudar aos rapaces a descubrir o misterio, tédelo que ler. 

Dende logo é un libro que te mete de cheo na historia que conta, xa que te fai pensar como é posible que dea unha badalada de máis e sobre todo ás doce da noite.

quinta-feira, 1 de março de 2018

CORISTRANCA DE NOVO NA ONDA


O pasado martes 20 de febreiro visitamos na Coruña novamente o estudo "José Couso" de Radio CUAC FM para emitir un novo programa " A fume de carozo", promovido polo Equipo de Dinamización da Lingua Galega do Colexio Calasanz (PP. Escolapios) da Coruña.

Nesta ocasión o equipo de guionización e locutación correu a cargo de membros do club de lectura de 4º ESO e por se non chegastes a tempo de os escoitar ao vivo ou queredes recuncar- agora é o momento estupendo desde este enlace que vos ofrecemos. 








Neste programa quixemos prestar atención especial á inmediata celebración do Día de Rosalía e descubir a María Victoria Moreno, autora destacada este ano na celebración do Día das Letras galegas ou a Eli Ríos, a autora que se esconde tras a intensa novela que acabamos de ler, Luns, publicada pola editorial Xerais.

Ogallá vos preste tanto escoitarnos como nós aprendemos preparándoo!

Até o próximo programa!

quarta-feira, 21 de fevereiro de 2018

E XOEL APRENDEU A VOAR


Hai uns días contabamos da tertulia ao redor do libro de Marica Campo, E Xoel aprendeu a voar. Pois ben, como eran varias as interrogantes que xurdiron, decidímonos a llas trasladar á autora, quen nos respondeu moi amabelmente.



Aquí vos deixamos esta entrevista epistolar con Marica Campo, a quen moito lle agradecemos o seu tempo e atención.




1. En que te inspiraches para escribir o libro?
Sempre digo que a inspiración é un misto ou chisqueiro para acender o lume, mais para facer a fogueira hai que xuntar leña. Que é a leña? Todas as experiencias vividas ou contempladas, deformadas polo prisma da imaxinación.

2. Canto tempo che levou escribilo?
Un mes exactamente.

3. Por que escolleches ese título?
Pensara en titulalo Xoel e o merlo branco; mais buscando que non houbese outro parecido, atopeime con que gardaba un paralelismo total con Xenaro e a mochila verde, así que entre outros moitos que se me ocorrían, escollín o que coñecedes.

4. Xoel representa algún familiar ou coñecido teu ou é un personaxe completamente inventado?
A actitude pasiva, abúlica, vina en máis dun rapaz, sempre desinteresado do que non fosen as novas tecnoloxías. Aínda hai dous ou tres días que lin como estas cousas, ademais do tipo de alimentación, tiñan a ver coa obesidade. Niso pensei tamén cando imaxinei o personaxe. Os nenos Daniel e Sara McNamee si que se chaman coma dous sobriños netos meus.

5. E o Merlo Branco?
Está inspirado nun señor a quen non coñezo en persoa (si á súa muller, que foi profesora de inglés nun instituto) que construía moto veleiros. El foi quen me explicou (por teléfono) como os facía. Doutra banda, gústame moito a relación cos avós. Tiven un que morreu cando eu tiña 14 anos e co que estaba moi compenetrada. Mesmo nalgún relato que falo dunha avoa, en realidade falo del. Só coñecín ao meu avó paterno e á miña avoa materna. Esta, aínda que era boa e cariñosa,  parecíame distante porque era moi refinada.

6. O final pareceunos moi precipitado, despois de toda a intriga da historia. Por que o fixeches así?

Para min era o momento do THE END, se cadra tivestes que lelo dúas veces para entender o que significaba porque nunca se di expresamente que o Merlo Branco era o avó. Quizais vos gustaría que se soubese máis do encontro da nai de Xoel e a súa nai norteamericana, mais hai que deixar espazo á imaxinación de quen le. Dicir, dise que se encontran e que “falou o sangue”, ou sexa, houbo un recoñecemento, o que os gregos chamaban unha anagnórise. Quen escribe, aínda que lles colla cariño, non debe quedar indefinidamente cos personaxes e alongar de máis a historia. Había un conflito e un enigma e, unha vez resoltos, a novela tiña que  acabar. De calquera maneira, se cadra tedes razón. Escribir é dubidar continuamente.

7. Poderemos ler pronto algún outro libro teu pensado para nós?
Estou rematando outra novela que, en principio, sería para xente máis nova. Porén, a medida que escribo, dubido da franxa de idade á que se debe destinar.

Unha aperta para todas e todos. Lede moito para medrar máis como persoas. Grazas por lle prestar atención a Xoel.



AS DE 2º TAMÉN QUEDAMOS!

Esta semana non podía comezar mellor!




O equipo lector de 2º ESO descubriu un grande historia e unha magnífica escritora que desde xa vos recomendan non perder: Ledicia Costas e Unha estrela no vento.

E tanto gustamos que foi irresistíbel a tentación de continuar a saber da súa escrita, así que xa andamos entre as liñas interespaciais d´O corazón de Xúpiter.

Contaremos!!!!


terça-feira, 13 de fevereiro de 2018

NOVO CAPÍTULO DO CLUB D@S EX-

A nosa ex- María Rodríguez volve connosco a través da lectura do libro Palabras envelenadas de Maite Carranza.

Comezade coa lectura da súa reseña e con certeza non resistiredes achegarvos á novela.


Durante o mes de xaneiro lin un libro que, tristemente, está moi relacionado coa actualidade. 

Palabras envelenadas trata sobre a desaparición dunha rapaza, Bárbara Molina. 

Esta rapaza é agredida física, sexual e psicoloxicamente por unha persoa da súa familia durante, máis ou menos, a metade da súa vida pero, aínda así, ela mantén a esperanza de que algún día poderá gozar da liberdade que merece.

Nesta historia tamén hai que destacar o papel da nai de Bárbara, Nuria Solís, quen sofre como o tempo pasa sen saber o paradoiro da súa filla, sen saber se algún día a volverá a ver…

O libro consta de tres partes e cada parte ten diferentes capítulos que están narrados en primeira ou en terceira persoa. A historia avanza rápido ata a metade da segunda parte, que se volve máis lenta pero á vez moito máis intrigante; tan intrigante que a persoa que está lendo chega a meterse no papel da protagonista e sentir o perigo que corre.

Recoméndovos esta lectura porque, nestes momentos e por desgraza para nós, as mulleres, é moi importante ter todos os sentidos alerta para que ningunha de nós sexa a seguinte en ser noticia no telexornal. 

Ninguén ten o dereito de arrebatarnos a liberdade, a felicidade e moito menos, a vida.

quinta-feira, 1 de fevereiro de 2018

ESTREANDO TERTULIA

O club de lectura de 1º ESO estreou onte a súa primeira tertulia literaria. E non parecían nada novatos á vista das brillantes intervencións e interpretacións do libro de Marica Campo, De cando Xoel aprendeu a voar.

Con todo, é de xustiza salientar que contabamos cunha voz lectora moi experimentada, a de Esperanza, unha mamá que sempre nos sorprende. Desta vez, ademais da súa lectura e do seu acompañamento presencial, agasallounos con esta ben fermosa e orixinal reseña da nosa lectura máis recente.

Que vos parece?


Non sexas abúlico

Vou dar a miña opinión
dunha maneira sinxela,
a lectura moito presta,
sempre que gostamos dela.

Sentinme identificada
con don Santiago e Xoel,
as obrigas do traballo
minguan horas de lecer.

As novas tecnoloxías
substitúen as persoas,
xigantes escaparates
para cando estades a soas.

Sae fóra tomar o aire,
deixa o móbil e o portátil,
fala! corre cos amigos!
e sentiraste máis áxil!

Busca o teu merliño branco,
deixa durmir a preguiza,
sube ao motoveleiro!
enche os petos de ledicia!


segunda-feira, 15 de janeiro de 2018

TERTULIAS DE ANO NOVO

Ano novo, tertulia nova!

Aquí estamos co club de lectura de 2º ESO para poñer en común o misterio e tensión que nos envolveu na lectura d´A neve interminable, de Agustín Fernández Paz.

Lucía achéganos unha breve reseña para deixarvos pistas lectoras a quen andades a procurar suxestións e María sorprenderavos moi axiña cun novo booktuber.

Si, si, lestes ben. Atención ás súas pantallas!!!





Este libro trata sobre tres mulleres e dous homes que eran guionistas de profesión e son os encargados de realizar unha nova serie para a televisión.

Para concentrarse deciden ir a un hostal en Lugo. Cada un deles crea unha historia e vana contando ao longo da semana. 

Mais a neve comeza a caer sen fin e empezan a notar algo raro nos donos do hostal…