domingo, 15 de março de 2015

ENTREVISTA A MARÍA REIMÓNDEZ


A autora de Usha! responde as nosas preguntas, unha vez rematada a lectura. 

Que magnífica sorpresa!!!

1. Que foi o que che inspirou o contido do libro?
Inspiroume a pouca sensibilidade que polo xeral temos cara ás persoas que viven noutras culturas, mesmo cando as temos ao noso arredor. É habitual que convivamos con nenas e nenos doutros lugares sen pararnos a pensar nas moitas cousas que poderiamos aprender das súas culturas e do importante que é esa aprendizaxe. Obviamente, tamén me inspirou o feito de levar convivindo co sur da India máis de 20 anos polo traballo que fago con Implicadas no Desenvolvemento (www.implicadas.com)
 
2. A personaxe de Usha nace dalgunha persoa real? E a nai? 
Non, a personaxe de Usha é unha personaxe de ficción, tamén a súa mai. Pero está baseada en todas as nenas que senten curiosidade polas outras e que queren buscar respostas ás cousas por si mesmas.

3. Por que nunca se fala do pai de Usha?
 
Para contestar esta pregunta debedes ler «Volvo! O regreso de Usha», de feito o libro naceu polas moitas veces que se me fixo esta pregunta a raíz de Usha. Non todas as nenas e nenos teñen un pai e unha mai, hai quen ten dúas mais, dous pais, vive só coa mai ou co pai, con avós e avoas. A literatura ten que dar cabida a todas esas nenas e nenos e deixar de fomentar unha sociedade na que só algúns/algunhas poidan verse reflectidas nos libros.


4. Á vista da túa biografía, pensamos que nesta lectura pode haber influencias das túas experiencias persoais na India. É así?
 
Creo que é importante non confundir a experiencia coa biografía. Por suposto que as miñas experiencias, non só na India, marcan o que escribo. Pero iso non quere dicir que eu necesariamente vivise exactamente as cousas que se narran nos libros. É certo que procuro escribir sempre de lugares que coñezo e nese sentido Devastana está directamente inspirada nunha aldea de Karnataka na que pasei bastante tempo e que se chama Jagalur. Cando eu visitei Jagalur por primeira vez hai máis de 20 anos non había nin un teléfono, hoxe ten páxina na Wikipedia (http://pt.wikipedia.org/wiki/Jagalur)! Loxicamente o libro reproduce a vida habitual na aldea pero as historias que se contan son o resultado da observación e logo a miña propia imaxinación.

5. É a vida na India tan difícil como se describe no libro?
 
Non era consciente de que a vida que se describa no libro sexa «difícil», creo que en todos os lugares as nenas e os nenos atopan diferentes atrancos e cousas que non lles gustan, pero eu confío na súa capacidade para forxar amizades e cambiar as cousas. A India é un país moi grande e as condicións de vida son moi diversas, non se pode tomar unha novela como a explicación dun país. Quero dicir con isto que cando lemos un libro protagonizada por unha nena ou un neno que vive en Galicia non pensamos que ese libro describa a totalidade do que acontece no noso país, non si? Pois o mesmo acontece con Usha.


6. Por que empeza o libro coa escena da picadura da serpe?
 
Porque no libro quería falar da confianza, da aprendizaxe e tamén enmarcar a Usha no seu contexto que nese tipo de cousas é moi diferente do noso.

7. Pensas voltar á India pronto? Que é o que te leva alí periodicamente?
 
Espero que no verán. O que me leva son as persoas e o traballo que fago con ellas, o que aprendo cada día.

8. Xa vimos que está publicada unha nova historia de Usha. Que podemos encontrar nesta lectura?
 
 Iso teredes que descubrilo vós mesmas/os pero creo que algo xa vos adiantei!


Moitas, moitas grazas, María, desde o Planeta Cristranca!!!

domingo, 8 de março de 2015

MISTERIO DESVELADO!!!

Preguntabamos hai uns días por onde andaba unha parte do noso club de lectura fóra do centro e en horario extraescolar...

Pois velaquí tedes a resposta gráfica...




















... e o testemuño sonoro neste enlace directo ao programa "A fume de carozo" que gravamos en RADIO CUAC FM na tarde do pasado martes.

Que opinades da estrea do noso equipo locutor?

Va que merecen todos os nosos parabéns Carmen Antelo, Soraya Mato, Ana Rodríguez, Samuel Abelenda e Elena Rey ?

terça-feira, 3 de março de 2015

POR ONDE ANDARÁ UNHA PARTE DO NOSO CLUB DE LECTURA?

E sobre todo...que andará a facer?


A ver se, en breve, contan algo porque esas caras son moi delatadoras...

segunda-feira, 2 de março de 2015

VIAXE CARA Á INDIA CON USHA



Usha, Devastana, Karnata, Lakshmi e Deepak son palabras que aprendemos a pronunciar grazas ao club de 1º de ESO o pasado xoves 19 de febreiro na tertulia á que nos convocou Usha, a novela de María Reimóndez.

Palabras raras, parecían... ou simplemente diferentes ás nosas?

Rematado o noso entroido galego, viaxamos cara á India para descubrir outras formas de existencia, ordenadas con culturas e palabras diferentes, mais expresivas de formas de vida propias do oriente que para nós, desde o occidente, son grandes descoñecidas.


Mais a emoción, a amizade, o amor a solidariedade sabemos que son sentimentos comúns que non entenden de razas, cores, linguas, vestiarios, costumes...

Aínda así, algunhas preguntas quedaron no ar e quen mellor que María Reimóndez, a escritora que converteu Usha en personaxe con vida propia para nolo contar.

Atención!!! Porque xa sabemos que dentro duns días lanzaremos por esta xaneliña unha entrevista en exclusiva que a autora nos acaba de conceder!!!